Les descomanaes desixencies en materia de protocolu covid y la menacia direuta de sanciones obliga a LA SIDRA a desconvocar el tradicional Sidracrucis. Les Feries d’Abril y les actividaes relixoses de Selmana Santa caltiénense ensin restriciones
Ca añu per estes feches la Fundación Asturies XXI en collaboración cola revista LA SIDRA cellebren la pasión sidrera na selmana santa de la manera más tradicional, espichando la sidre nuevo del añu entrante na Primer Sidre l’Añu y percorriendo chigres y llagares al son de la gaita nel Sidracrucis.
La xixilancia municipal dificultare ya’l desendolcu de les caberes ediciones d’esti eventu, poniendo torgues a que se tocare la gaita peles cais, pesi a que l’horariu nun yera nuecherniegu, polo que los organizadores tuvieron d’amosar en delles ocasiones el permisu llegal pa poder continuar cola cellebración del eventu.
Esti añu y pesi a que’n toles sos actividaes ye enforma curiaosa nel siguimientu del protocolu covid, la organización recibió un avisu direutu, alvirtiendo de que nesta ocasión la norma xixilaríase mui estrictamente y de que “casu que daquién incumpliere la normativa covid, mesmamente posando el mázcaru en llugar preslláu, sedría la organización la considerada llegalmente responsable, cargando con una sanción darréu” . Dende LA SIDRA esculpiense colos participantes y chigres perxudicaos y comuniquen qu’ello nun dexa más salida que la cancelación, ya que nun puede asumir el riesgu de que dalgún de los participantes dexe’l mázcaru baxáu más de lo estrictamente necesario pa beber el culín.
El fechu de que’l Sidracrucis tuviere convocáu pa namás 5 díes anantes de que desapaeza la obligación d’usar mázcaru n’interiores fae qu’esti escesu de celu resulte incomprensible, tantu más cuando nes munches cellebraciones relixoses importaes de la selmana santa española -pasucais, mises, via crucis…- nun s’apliquen les mesmes restriciones.
La Primer Sidre l’Añu desendolcaráse con normalidá del 14 al 17 d’abril nel Muséu del Pueblu d’Asturies.
Llucía F. Marqués
This work is licensed under a Creative Commons Attribution 4.0 International License.
