La Primer Sidre l’Añu –PSLA–, qu’esti añu cumple la so duodécima edición, vuelve a Xixón del 14 al 17 d’abril nel Muséu del Pueblu d’Asturies, n’horariu, el xueves de 13:00 a 21:00 hores; el vienres y el sábadu, de 12:00 a 21:00 hores ya’l domingu, de 12:00 a 18:00 hores

Miles de persones tornarán aconceyase esta Semana Santa nel Muséu del Pueblu d’Asturies alrodiu la bebida tradicional asturiana, gracies a la cellebración de la Primer Sidre l’Añu, un eventu mui familiar y de gran raigañu na ciudá, nel que cultura,arruelu, tradición y gastronomía van de la man. Una gran oportunidá p’averase al mundu la sidre y pa esfrutar d’él, polos namás 7 euros que cuesta la entrada y que permiten tastiar tola sidre que se quiera de decenes de llagares. Esti añu el llagar protagonista sedrá’l de Roza, ganaor del Concursu Meyor Primer Sidre l’Añu 2022.

A lo llargo de les cuatro xornaes sucederánse abondes actividaes enmarcaes na tradición asturiana, comu’l X Concursu de Sidre Casero fecho en maera, pal que ya se recueyen botelles, la XI Asturianada y Sidre que rendirá homenaxe a la canción asturiana el vienres 15, abondes actividaes pa la reciella, música y baille’l país, tasties guiaes de sidre, esporte y xuegos tradicionales y muncho más.

La PSLA, que cuenta col sofitu de la revista LA SIDRA y de la Fundación Asturies XXI, inagura la temporada sidrera n’homenaxe a les tradicionales espiches nes que s’abren los toneles y se preba la primer sidre de la collecha. Amás de ser una de les cellebraciones más enraigonaes de la cabera década en Xixón, los sos organizadores destaquen la so influyencia nel procesu de reconocimientu de la cultura sidrera asturiana comu Padremuñu Cultural Inmaterial pola UNESCO.

Redaición InfoAsturies

This work is licensed under a Creative Commons Attribution 4.0 International License.