La non reconocencia de la especialidá docente de llingua ye namás la parte más rescamplante d’una discriminación qu’inclui temporalidá, interinidá, imposibilidá d’adquirir la condición de funcionariáu de carrera, falta reconocimientu de la formación académica ya itinerancia
El 75% de los profesores d’asturianu que trabayen pa la escuela pública tan contrataos a media xornada, siendo cuasi dafechu una plantiya interina y abondando les places itinerantes, pilancos toos ellos p’algamar la naguada estabilidá llaboral de los 343 profesores d’asturianu emplegaos anguañu.
L’índiz de contratación temporal cuasique duplica al d’otres especialidaes, si ye que podemos utilizar esa espresión, porque la especialidá docente sigue ensin tar reconocía, dexando a estos profesores nun arba llegal na que si quieren optar a una plaza fixo nun pueden ver reconocío al 100% los sos años d’esperiencia, en casos más de 30, dientro d’una especialidá que nun esiste, concurriendo en desventaxa con otros profesores d’especialidaes reconocíes.
Aparte d’ello les titulaciones que reconocen la conocencia del asturianu son titulaciones alminstrativamente valeres, ensin efeutos llaborales nin económicos. Per un lláu, los certificaos adautaos al Marcu Européu de les Llingües nos niveles B2 y C1 de competencia llingüista n’asturianu espedíos pola Conseyería d’Educación nun sedrán valoraos nes pruebes d’accesu a la docencia nes mesmes condiciones que los d’otres llingües del Marcu Européu al nun cuntar col preste de la dirección d’una Escuela Oficial d’Idiomes (EOI).
Pel otru, los títulos d’Espertu y Especialista en llingua asturiana otorgaos pola Universidá d’Uviéu, que, pola so duración, equivaldríen a los actuales títulos de máster y tendríen de ser equiparaos a los niveles avanzaos de competencia llingüística del Marcu Européu de les Llingües tampoco son valoraos nel separtáu de formación académica nos procesos selectivos.
Según declaraciones del Sindicatu d’Ensiñantes SUATEA “Magar que nel últimu congresu de la Federación Socialista Asturiana-PSOE, celebráu’l 18,19 y 20 de marzu de 2022 n’Uviéu, estes organizaciones se definieren como asturianistes, tolos fechos y circunstancies descritos darréu rescamplen el despreciu y la falta de compromisu del Gobiernu asturianu coles nuestres llingües”
Denuncien amás la falta de procuru y dilixencia de l’Alministración a la hora de dar seguridá xurídica a les sos actuaciones “nun ye de recibu crear títulos ensin cobertoria reglamentaria que garantice la so valoración”.
Nuria Prendes
This work is licensed under a Creative Commons Attribution 4.0 International License.
