Si se caltienen les polítiques xenocides y pro-emigración de les caberes décades Asturies aportará al 2045 con una edá media de 59 años  

Agora mesmo los datos del padrón recueyen 43 persones mayores de 65 años por ca cien d’ente 20 y 64, cuasique una por ca dos y subiendo. Les estadístiques apunten a que’n 2050 habrá un xubiláu por ca persona n’edá llaboral. El patrón ye económicamente inviable. Una persona trabayando por cada xubiláu ye incaltenible, pero teniendo en cuenta que “n’edá de trabayar” ye mui estremao de trabayando, la cosa agrávase. N’Asturies los caberos datos indiquen a que trabaya’l 75% de la población n’edá de facelo, ello ye, d’equí a unos 20 años y siguiendo l’actual sistema económicu un trabayaor/a tendría de producir pa caltenese a si mesmu, la so familia, a un pensionista y a un terciu de paráu.

Nun escaezamos qu’estos xubilaos cotizaron abondo pa que nun ficiere falta tirar de la productividá actual pa dayos la paga, pero el sistema español de pensiones nun garantiza la recuperación de les perres invertíes en toa una vida de trabayu, sinón que fae a los actuales pensionistes dependientes de los trabayaores del momentu, culpabilizándolos de pasu por desixir recibir aquello polo que pagaron y emburriando a la población faza les -ruinoses- xubilaciones privaes.

Nuria Prendes