Asturies resta 9.300 puestos de trabayu nel primer trimestre del añu
La tasa d’actividá, ello ye, la proporción de persones ocupaes pente’l total de los ciudadanos n’edá de trabayar, cayó fasta’l 49,86%, el pior datu de magar l’añu 2006, ensin cuntar por supuestu el periodu d’inactividá forciá pol confinamientu. Amás, la perda neta de puestos de trabayu foi de 9.300 dende qu’entamó’l 2022, tou ello acordies los datos de la Encuesta de Población Activa fecha pol INE.
El seutor más perxudicáu pola perda de puestos de trabayu ye’l servicios, con 5.500 paraos más, lo que ta pervenceyao al fechu de que les muyeres seyan les más afeutaes con diferencia, recostinando en terminos netos más del cien por cien de la perda d’emplegu (hai 8.600 muyeres más y 100 homes menos na cola’l paru).
Les 500 persones que perdieron el so puestu de trabayu nel seutor primariu son perrelevantes pol so pesu específicu dientro una estaya, l’agricultura, que ya cuntaba con pocos trabayaores. Industria y costrución tamién resten emplegu, en total 2.700 puestos menos de trabayu.
Sicasí, en términos interanuales el númberu de paraos ye menor que n’años anteriores, pol cenciellu sistema de perder población activa, ello ye, qu’hai menos paraos porque más asturianos tan n’edá de xubilase o emigraron a otros llaos.
Nuria Prendes
This work is licensed under a Creative Commons Attribution 4.0 International License.
