Xicu Llamazares

Cola meyor intención voi da-y al Sr. Jaime Izquierdo un par de notes, de xemes en cuand,u sobre comu facer pa qu’Asturies nun se vacíe d’asturianos. Fadré por que seyan idegues práutiques, cencielles de desendolcar y de presupuestu asumible

Güei entamamos con una fácil: l’argayu de Pendones -digo’l de Pendones pero podríen ser otra docena d’ellos-. Cincu meses ensin iguar. Cerca mediu añu, y lo que yos queda, nel que los vecinos tienen qu’escoyer pente dar un rodeu de dellos km o arriesgase a argayar ellos tamién. Ganaeros y agricultores precisen esa pista, agora intransitable, p’aportar a les sos finques pa dir a trabayar. Los vehículos nun pasen y nun ye de recibu arriesgar a que les vaques rompan una pata, asina que toca dir pel camín llargu. Asumiendo la edá media de la xente que vive nos pueblos, el camín llargu pue ser tan llargu que lleve a dar la vuelta, a quedar en casa, a dexalo tou, vender les vaques y retirase; tan llargu que lleve al posible relevu xeneracional fasta dalguna ciudá na que dir al trabayu nun seya una aventura.

Iguar l’argayu de Pendones, o’l de Cabañaquinta, el de Casazorrina, el de Viboli o’l de Sotu la Barca, con unos plazos asumibles, ye un pasu más nel camín de caltener la población nos pueblos. O si lo prefieres, un pasu menos nel enfotu por echalos d’ellos.

Puestos a ser repunantes, meyor tovía sedría prevenir los argayos, evitando asina acidentes comu los que causaron tres muertes l’añu pasáu. Nesi sen tamién el gobiernu asturianu tien que dicir enforma: Los xeólogos lleven décades alvirtiendo sobre la costrución ya igua de carreteres ensin estudiu xeolóxicu previu y de les consecuencies previsibles, pero sigue aforrándose nesa partía ya ensin contratase los correspondientes profesionales.

Amás, la BAPA (Base d’Argayos del Principáu d’Asturies), creá nel 2014 gracies a una tesis doctoral y que recoyía tolos argayos de magar el 1980, permitiendo prever les zones de pelligru, dexó d’actualizase nel 2020, “por falta presupuestu”. Ehí lo dexo.

This work is licensed under a Creative Commons Attribution 4.0 International License.