141.400 persones, 60.100 homes y 81.300 muyeres, viven solos n’Asturies, una cifra que medra de magar el 2013, cuando yeren 130.900 los asturianos que vivíen solos

Denguna otra fastera l’Estáu presenta datos tan esmoleceores, el 31% de los llares asturianos, cerca d’un de ca tres, son unipersonales, ello ye, nellos viven una persona sola, siendo esta la modalidá de vivienda más avezada n’Asturies. Ello, que podría ser una opción personal, nun lo ye tantu cuando miramos les cifres y vemos que corresponden mayoritariamente a persones de más de 65 años, viéndose un peraltu porcentaxe de vilbes, con fios y ñetos emigraos fuera d’Asturies y que nun puen facese cargu d’elles. La salú mental ye una de les primeres víctimes nestos casos.

Dientro de los llares unipersonales alcontramos una desemeyanza importante en función del sesu. Seique la mayoría tan ocupaos por persones de más de 65 años, pente les muyeres trátase fundamentalmente de vilbes, mientres que los homes que viven solos son bultablemente más mozos y sobre tou  solteros o divorciaos.

Pesi a que más d’un terciu de la mocedá d’ente 25 y 34 años continúa viviendo colos sos pas y medren les families que se reagrupen alrodiu los güelos por xides económiques, namás el 14% de los llares tan ocupaos por families de cuatro o más persones, tando la media asturiana en 2’1 persones por llar.

A les cases nes que vive una persona namás pue sumáseyos aquelles nes que vive namás un adultu. Los llares monomarentales continúen integraos na so mayoría (85 %) pola ma y los sos fios, concentrando amás esti modelu familiar les rentes más baxes.

En resume, n’Asturies viven ca vegada menos families, más piqueñes y con más soledá pente les persones mayores.