Baxo’l títulu ‘Falantes de llingua asturiana: Una comunidá minoritaria ensin drechos llingüísticos. ¿Qué podemos facer?’ el representante d’Iniciativa pol Asturianu fizo un repás a la represión llingüística y a les dificultaes de los falantes
Inaciu Galán reclamó nel Foru un papel más activu na defensa de los drechos llingüísticos por parte l’Altu Comisionáu de les Naciones Xuníes pa los Drechos Humanos
Inaciu Galán, vocal de rellaciones institucionales ya internacionales d’Iniciativa pol Asturianu, participó los díes 2 y 3 de mayu nel Foru Rexonal Europa-Asia Central de la ONU que se celebró en Viena. El representante de la entidá aprovechó l’alcuentru internacional sobre minoríes pa falar de la so esperiencia de trabayu dientro d’Iniciativa pol Asturianu como activista llingüísticu.
Baxo’l títulu ‘Falantes de llingua asturiana: Una comunidá minoritaria sin drechosllingüísticos. ¿Qué podemos facer?’ el vocal d’Iniciativa pol Asturianu desplicó la hestoria del idioma y fizo un repás a la represión llingüística y a les dificultaes de los sos falantes. Galán recordó que “a lo llargo de los cuarenta años de la dictadura, les llingües que se falen n’España, distintes del castellán, sufrieron prohibición y represión. Les escueles fueron el llugar onde se vivió con más intensidá la represión llingüística n’Asturies y Llión”.
El representante de la organización añadió que “la llegada de la democracia supunxo un cambéu nel tratamientu de les llingüe sn’España, pero la llingua asturiana nun alcanzó la oficialidá, sólo una protección menor. Por esi motivu, l’asturianu ye güei una llingua minorizada, con un númberu cada vegada menor de falantes y con dificultae sp’avanzar nel sieglu XXI, a pesar de munchos avances llograos pola sociedá civil a lo llargo de los caberos trenta años”.
“Cuntamos con una comunidá llingüística consciente del pelligru y activa na so defensa, con organizaciones como Iniciativa pol Asturianu, Faceira o Reciella – Families pol Asturianu, ya instituciones como l’Academia de la Llingua Asturiana trabayando pa consiguir un futuru con más drechos y más protección pa los nuesos idiomes” apuntó Galán nel alcuentru internacional.
Galán fizo un llamáu a los representantes de la ONU esixendonel Foru “un papel más activu na defensa de los drechos llingüísticos por parte del Altu Comisionáu de les Naciones Xuníes pa los Drechos Humanos y aportó varies propuestes pa trabayar dende les instituciones como “faer un estudiu de la situación de cada llingua europea, establecer estándares de medición que permitan una comparación efectiva de la situación de les llingües y crear un plan d’emerxencia pa la salvaguardia de los idiomes”.
P’acabar, l’activista recalcó que “el nuesu idioma, como munchos otros nel mundu, alcuéntrase nuna situación de pelligru y necesitamos el mayor sofitu internacional posible. Les declaraciones de drechos son mui simbóliques ya útiles en términos de crear conciencia sobre los problemas, pero tienen d’abordarse activamente”.
Alberto Rodríguez
This work is licensed under a Creative Commons Attribution 4.0 International License.
