Xose Lluis García Arias: “Yo nun vi a naide del PSOE falar tan a favor del asturianu comu a la escontra lo fizo’l señor del Tocomochu”

5 Mayu, 2022

ENTREVISTA A XOSÉ LLUIS GARCÍA ARIAS (2ª entrega de cincu)

Falamos col espresidente del so llabor dientro l’Academia de la Llingua Asturiana

Nos tiempos complicaos en qu’usté presidió l’Academia de la Llingua, ¿qué xeres, ordinaries y estraordinaries, tuvo de facer ésta pa garantizar la pervivencia l’asturianu comu llingua viva?

Les fonciones de l’ALLA vienen ñidiamente esplicitaes nos sos Estatutos. Y esos Estatutos diolos el Gobiernu asturianu, nun fui yo. Foron ésos los nuesos Estatutos, a ellos mos atuvimos. Y cumplímoslos, porque si nun los cumpliéremos, tendríenmos llamao al orde darréu y, amás, de mou concisu. Felizmente nun fizo falta eso.

Pero ye verdá que l’Academia d’una llingua que ta recuperándose tien tamién la necesidá d’atender una serie de custiones de tipu social, porque si nun les atendíes y te posicionabes sobro elles entós nun se diben poder entender dalgunes coses. Ye verdá qu’una llingua, cuandu se vindica, cuandu s’intenta escribir, cuandu dempués d’un gran periodu hestóricu’n que ta siendo nenguneá y desprestixá poles clases altes, una istitución tien de recordar a esa sociedá algunes coses elementales que fae falta remembrar. Comu, por exemplu, que les llingües nun tán nel aire nin viven na rexón de les idegues, sinón que les llingües tán en boca de los falantes. Si los falantes tienen enriba tolos prexuicios propios de la clas social dominante, si la clas dominante diz a les clases populares que falar asturiano ye de fatos, de probes y de xente de poca cultura, pos evidentemente la xente va creyer qu’eso ye la verdá. Y agora vete tu a la xente a desplica-yos qu’eso que-yos enseñaron esos señoritos ye mentira.

Cuesta tiempu, cuesta trabayu y cuesta tamién grandes disgustos, a mí costóme grandes disgustos y comu a mí a otros munchos que tamién s’esmolecieron por facer vidable la llingua. Xustamente por eso a vegaes diximos coses o ficimos coses que nun son estatutaries al cien por cien, pero nun contradicen los Estatutos de l’ALLA nin van a la escontra de lo que dicen los más elementales drechos de la xente.

L’ALLA tien les fonciones que tien y son les que dicen los Estatutos. Y en dengún puntu d’esos estatutos se diz que l’ALLA seya’l muérganu fundamental na preparación del profesoráu, nin diz que tien de ser quien lleve alantre la política llingüística, nin coses pol estilu. Ye indubiatible que non. Pero nun momentu’n que la mesma Conseyería Cultura y el mesmu Gobiernu asturianu nun sabíen qué facer, había que dir dando alternatives a la situación que teníemos naquel intre. Neses alternatives que dábemos taba’l nuesu pidíu de que se formare’l profesoráu de Llingua Asturiana, porque nun taben preparaos, porque la Universidá nun los preparaba. ¿Y por qué nun los preparaba, porque nun quier? Non, nun los preparaba porque nun taba nello, porque naide nun-y dicía que lu preparare. Y, en consecuencia, l’ALLA fizo munches veces esi llabor que nun yera’l propiu d’ella, pero tábemos aguardandoa que les istituciones crearen los muérganos afayaízos.

Y asina foi. En cuantes el Gobiernu asturianu fexo qu’entamaren a salir titulaos en Llingua Asturiana de la Escuela Maxisteriu o de la Facultá Filoloxía, nesi momentu’l papel de l’ALLA comu formaora’l profesoráu vieno a menos. L’ALLA siguió y sigue collaborando, porque eso nun va a la escontra la so esistencia, pero nun ye la fonción fondamental d’ella, claro.

Ye lo mesmo qu’en toponimia, una custión na que tenemos de trabayar comu mos compete facelo; eso nun quier dicir que se vaiga escontra les reglamentaciones que pue tener l’Estáu. Una custión, la de la toponimia, que, por cierto, nun acaba de cuayar d’una vez comu realidá: que pongan la toponimia al dreches, que la corrixan y con cabeza, pa que nun haiga contradiciones y pa que nun se gueten coses rares.

Dempués d’unos años de gran actividá y compromisu al frente l’Academia de la Llingua, y cuntando comu cuntaba cola confianza popular y el sofitu del movimientu de vindicación lligüística, ¿pue recordamos los motivos polos que consideró conveniente dimitir?

La mio dimisión debióse, fundamentalmente, a que llevaba yá venti años al frente de l’Academia, dende 1981 a 2001. Venti años de xera cansen, yo taba realmente cansáu. Y, amás, yo tenía una cosa clara: que’l mundiu nun s’acababa conmigo. Los demás tamién diben saber llevar alantre la vindicación llingüística, caún al so aire, pero de xuru que lluchando a favor del idioma.

Dimití amás nun momentu nel que l’ALLA taba n’alza, porque veníemos de facer dalgunes obres fundamentales de l’Acadamia, comu son la Gramática y el Dicionariu. Aparte d’otres coses, teníemos fechu’l llabor académicu esencial, colos pasos primeros daos y mui bien daos. Nesi sen yo sentíame contentu colo que se fexere, pero taba cansáu porque eso galde a un caballu. Porque sabes que somos pocos, sabes que si nun t’entregues dafechu les coses por sí soles nun van…Eso crea una dináminca de trabayu, pero tamién crea un cansanciu. Machaca estraordinariamente porque non sólo ties que tirar tu polos problemes que surden, sinón tamién de toles otres coses qu’apaecen alrodiu. Y non sólo ties crítiques xustes, sinón que munches vegaes tamién ties crítiques que tán poco sofitaes, poco pensaes. De xuru que too ello intervino nel fechu de que yo dimitiera.

Nel momentu nel que me paeció que l’ALLA nun ye que fora intocable, comu se demostró llueu que nun yera intocable, pero que l’ALLA taba bien, mínimamente bien de cara a la sociedá, con argumentos notables pa poder facer les coses con mayor sofitancia, pos dixe que yera’l momentu. Y entós había presones que podíen siguir al frente l’Academia, comu foi’l casu de Miguel Ramos Corrada y dempués Ana Cano.

Ye verdá que daquién taba oservando dende dalgún sitiu y debió dicir “a por ellos”, pensando que la vindicación llingüística yera namái una zuna mía. Enquivocáronse, evidentemente, porque supieron da-yos contestación. Y pesia tolos pesares l’ALLA siguió p’alantre. Y ésa ye la gran satisfaición que tengo. Pasáronmos un montón de coses, porque l’ALLA sufrió ataques enforma, munchos provinientes del poder, otres vegaes de cantamañanes de chigre y otres de presones que se dedicaron poco a preocupase del futuru cultural d’Asturies, cenciellamente eso. Pero l’ALLA siguió sofitándose y continuó faciendo les coses bien, comu ocurre fasta esti momentu.

Esto ye, con altibaxos, con coses meyor o pior llograes, evidentemente, pero l’ALLA presenta resultaos positivos siempres.

Ye verdá que dalgunos de los oxetivos de l’ALLA teníen de tar llograos yá y entá nun lo tán, pero claro, comu Academia que somos nós nun tenemos tolos elementos na man pa poder dicir que vamos tomar esta o aquella decisión política, porque nun podemos tomar determinos políticos. O vamos a facer esta campaña social, porque nun tenemos nin dineru nin posibilidaes de facer con seriedá una campaña social.

Pero, a poco que mos dexaren facer, de xuru que les coses sedríen mui estremaes. Porque la sociedá asturiana nun ye lo que mos presenten estos llogreros de cabera hora. La sociedá asturiana ye totalmente razonable; nun ye masimalista na custión llingüística, pero nun ye tonta tampocu y nun ve mal que les coses vaigan bien. Lo que pasa que si sólo dexamos qu’escriban nos periódicos les estremes de les estremes, pos claro… Yo nun vi nel PSOE, salvo dalgún casu, a naide que falare agora a favor del asturianu col puxu que se-y vio naquelles pallabres tan gafes emplegaes escontra d’ella al señor aquel del Tocomochu. Nin vi a otros que falaren distinto de pretendíos Conseyeros que, dende llueu, necesitaben un bañu de cultura popular asturiana.