ENTREVISTA A XOSÉ LLUIS GARCÍA ARIAS (3ª entrega de cincu)

Falamos col espresidente del Estatutu d’Autonomía

Acabamos de dexar atrás unos meses d’auténticu fervidoriu en materia de reforma estatutaria. Pero convién remembrar tamién el procesu autonómicu que finó en 1978. ¿Cómu valora usté aquel primer procesu no político, no social y no llingüístico?

Hubo un puntu que yo creyo positivu y que se pue destacar: por primer vegá Asturiespresentaba una hestoria autonómica con más coses que dicir de lo que normalmente se diz. Porque, claro, depende de lo que nomemos comu autonomía, porque Asturies tuvo un Reinu, que ye l’autonomía por antonomasia. Asturies tamién tuvo la Xunta Xeneral del Principáu na Edá Media. N’époques posteriores esa Xunta Xeneral d’Asturies nomóse soberana, qué curioso, eh; declaró la guerra a Napoleón y unvió embaxaores propios a Inglaterra. Si eso nun ye autonomía, que me vengan a cuntar qué ye autonomía.

Pero nun sólo tán estos fechos, qu’otros escaecen llamentable y misteriosamente. Asturies demientres la Guerra Civil entamó’l Conseyu Soberanu d’Asturies y Lleón; ello quier dicir que, poles razones que seyan, Asturies nómase soberana. Asturies sigue cola tradición de que pue dicir que ye ella. Y esto ye importante, esto ye mui importante.

Y el que podamos dicir que na hestoria d’Asturies hai determinos de soberanía nun quier dicir que seyamos separatistes, nin que pidamos la separtación o dixebra d’España. Eso nun se deduz. Que pue haber cuatru que lo digan, bono, ye responsabilidá d’ellos. Yo nun lo dixe. Y l’ALLA nun se nomó soberanista’n dengún momentu, nin dixo qu’había de poner fronteres.

Solamente la mala fe de dalgunos, que lleen poco y mal, pue poner en boca nuesa coses d’esi calter.

L’autonomía nun implica dixebra d’Estáu. La llingua nun implica acabar col castellán. A nós tamién mos interesa saber falar castellán y otres llingües. Pero l’asturianu primero y el castellán a continuación o al empar.

Con esta hestoria autonómica que presenta Asturies, claro, l’autonomía del 78 ye probe y ruina. Tamién ye lo único que se pudo llograr n’aquel momentu coles fuercies polítiques que teníemos.

A mí allégrame ver qu’agora una presona comu’l presidente Silva, al que yo aprecio muncho, sepa reconocer dalgunos de los problemes duros d’aquella autonomía del 78. Yo podía dicir dalguna cosa más porque tengo datos que nun vi cuntaos n’otros sitios. Pero, bono, paezme bien que reflexone y que diga coses y que, sobro too, seya cosciente de cómu lu teníen atáu; no poco o muncho que podía facer, cómu lu teníen atáu, que tamién lo sé.

Y tamién sé quién decidió qu’Asturies, llográ l’autonomía naquel momentu, nun tuviere una autonomía con Lleón, ensin camentar si yera bono o malo. A lo meyor nun yera necesario, a lo meyor nun mos convenía, nun voi decidir sobro eso agora. Lo que sí sé ye que quienes decidieron eso nun teníen ná que ver con Asturies, comu foron los casos del socialista Gregorio Peces Barba y del popular Rodolfo Martín Villa. Dividieron Asturies y Lleón, creyendo qu’Asturies yera d’esquierdes y dalgún nun lo quería contaminar con Lleón, y otros que Lleón yera de dreches y nun tenía que ser contaminao por Asturies.

Y entós ficieron les dos autonomíes que ficieron, Asturies y Castiella-Lleón. Nós podíamos dir a una autonomía solos, pero a lo meyor, con una serie de pautos previos, ente otros l’idioma, a lo meyor nun mos resultaba mal camentar en dalgún momentu algamar una autonomía con Lleón; siempres que la custión identitaria tuviere clara, non una razón identitaria que fore molesta pa naide, pero sí un plantegamientu seriu, sensatu y recuperaor del idioma.

Entós yá veríamos a ver qué pitón mos canciaba tanto. Col doble de representación nes Cortes. Y con más pesu específicu nel conxuntu l’Estáu.

Y reparemos en que toi faciendo un plantegamientu autonomista, non un plantegamientu separatista. Yo nun falé de dixebra pa esto, porque yo nun soi dixebriegu, porque creyo qu’Asturies pue llograr plenos poderes y plena presonalidá dientru d’un Estáu español. Y agora hai dalgunos que nun mos quieren dexar. Pero nesi momentu con eso yá nun mos basta, porque tamos nel vagón de cola del procesu autonómicu.

Yo quiero una autonomía comu la de los catalanes, y la de los vascos y la de los gallegos. Yo quiero una autonomía d’éses.

Al so paecer, ¿Asturies ye una nación hestórica?

Al mio paecer, sí. Y preba d’ello ye que llogró’l poder nel so momentu. Esto nun implica que, güei por güei, vaigamos exercer nengún drechu nesi sen.

¿Considera que sólo camudando un Estatutu d’Autonomia impuestu ye posible consiguir avances políticos, sociales, económicos, llingüísticos… que resulten suficientes o de notable interés pa los asturianos?

Evidentemente. Lo que güei tenemos nel Estáu ye un guirigai que nun se pue mantener munchu tiempu. Porque agora los asturianos sí que mos podemos entamar a sintir realmente maltrataos por nun tener los mesmos drechos qu’otros.

Eso ye un elementu de distorsión y, en consecuencia, hai que tender a que toos podamos tener una autonomía acordies coles lleis del Estáu y acordies coles propies aspiraciones de les comunidaes.

Pero, claro, ello desixe que los nuesos políticos sepan dar el do de pechu y que tengan fustax. Porque lo grave del asuntu ye qu’abondes vegaes la medianía de munchos políticos foi l’elementu torgaor, el que fizo imposible qu’hubiere política serio nin un desenrollu estatutariu interesante. Pero ¿pa qué queríen l’autonomía, si-yos bastaba con una conceyalía o con un directoráu nun sé ónde? Claro, ya teníen bastante. Nun había políticos de fustax, nun daben pa más.

This work is licensed under a Creative Commons Attribution 4.0 International License.