Xicu Llamazares
¿Hai daqué que representare más a Asturies que los mineros, la mar y les vaques? Colos primeros ya finaron, la pesca ta cimblando y les industries llactees compaxinen el so preslle cola falta de relevu xeneracional na ganadería
Preslla Danone. Preslló La Polesa. Costes endemasiao altos pal volume de negociu, aleguen, nun ye rentable. El casu de Danone, ye cierto, ye más grave: presllá la fábrica nun queda, lliteralmente, industria nel conceyu, un pasu más pa vaciar el paradisu. Adrián Barbón ponse les piles (con Danone, de Reny Picot-La Polesa pasó enforma) y pente esparabanes d’ofensa promete soluciones, negociaciones, aiciones… cuando toos sabemos que fala al sabor de la boca y que nun va facer na por camudar la situación. Como nun fizo na, nin el nin el so partíu, por aparar el preslle, progresivu y tarrezo que definitivu, d’Asturies.
Ta por ver si pasaos unos meses nos cuenten que’l metanu de les vaques ye perxudicial pal mediu ambiente, que les granxes, macro o micro, son coses del pasáu y qu’entramos en fase de desllechización, o de reconversión bovina, o a ver como se-yos ocurre llamalo esta vuelta.
Cruciemos los deos, entá nos queda la sidre.
This work is licensed under a Creative Commons Attribution 4.0 International License.
