El Plan d’Aición d’Atención Primaria y Comunitaria 2022-2023, presentáu pol “Principado” al Ministeriu de Sanidá, debuxa una atención mélica que nos recuerda a los Supersónicos. La mocedá nun sabrá de que falo, pero ya nos debuxos animaos de los 70 salía el mélicu a distancia y la teleconsulta; y los coches volaores
La Sanidá Pública asturiana “apuesta polos proyeutos de teleconsulta, acesu a imáxenes méliques, emisión d’alertes individualizaes y la deteción remota de riesgos a traviés de ferramientes informátiques y de ‘big data’, desplegando la telemedicina –telecardioloxía, teledermatoloxía y teleoftalmoloxía– ya implantando l’usu de chat-bots”.
De primeres suena tremendo, pero falamos d’un sistema sanitariu nun ye quien nin a dar cita correchamente ensin echar una mañana al teléfonu. El personal malamente pue atender les consultes físiques, que medraron un 25% nel caberu añu y los medios téunicos lleven, por asina decilo, una cierta obsolescencia; toos conocemos polo menos un mélicu qu’entá teclea (aporrea) l’ordenaor a deu.
Por nun mencionar el fechu de qu’al otru lláu, el del paciente, habrá una persona, xeneralmente mayor, que nun tien porque tener nin los medios nin los conocimientos pa operar telemáticamente. ¿Cuantos de vosotros imaxinais a la vuesa ma o güela unviando un escaner de retina pel ordenaor? ¿Cómo se-y diz al dermatólogu per onde te pruye ensin poder señalar, especialmente nun sistema que nun reconoz siquier el vocabulariu de la población pa referise a les partes del cuerpu?. Nin siquier yo teo nidio lo que ye un chat bot o’l big data. Dexando aparte la descomaná importancia del contautu humanu en persones que viven soles, n‘Asturies el 14% de la población.
Implantar un sistema comu el que planteguen llevaría perres y tiempu, muncha formación, munchu personal y muncha inversión en teunoloxía. No que cinca a perres, presupuesten 12 millones nos dos prósimos años, pero nun se reserva partía pa contratación de mélicos. La planificación de recursos humanos coxea per tolos llaos, y asina va siguir entantu les condiciones llaborales nun meyoren, coles qu’hai lo mélicos nun quieren quedar.
El paulatín desaniciu de la presencialidá, por muncho que nos lo antroxen de futuru cibernéticu, implica cenciellamente’l desaniciu de la Sanidá Pública, lo que nuna población que presenta un indiz d’avieyamientu que supera’l 222% y que tien un 56% en situación de dependencia, nun se pue traducir más que comu dexar morrer a quien nun puea pagar.
Llucía F. Marqués
This work is licensed under a Creative Commons Attribution 4.0 International License.
