Los picos de contaminación atmosférica disparen los ingresos hospitalarios n’Asturies por enfermedaes respiratories d’alcuerdu a un estudiu epidemiolóxicu realizáu pola conseyería de Sanidá del Principáu d’Asturies y presentáu l’añu 2018

Según los datos oficiales sobro contaminación atmosférica y calidá del aire espublizaos na web del Gobiernu d’Asturies, el canceríxenu bencenu presentó unos valores bien altos mientres la última selmana, llegando a concentraciones de 39 µg/m3 nuna hora na estación de control de la calidá del aire de Trubia, superándose por tantu la llende horaria pal bencenu, que ta afitá en 33 µg/m3 nes autorizaciones ambientales de les empreses químiques istalaes na zona. Estos picos de bencenu rexistraos en Trubia tienen de cutiu un reflexu na estación de Ventanielles, asitiada a más d’once kilómetros de la primera, lo que da una idega del algame del problema.

La Organización Mundial de la Salú (OMS) nun atopó nengún valor perbaxo’l cual la esposición al bencenu nun pudiere ser potencialmente nociva pa la salú. La mesma Comisión Europea encamienta nun esponese a esti peligrosu contaminante.

Convien recordar que según l’Axencia Internacional pa la Investigación del Cánccanu, el bencenu ye un compuestu orgánicu potencialmente carcinoxénicu que, en siendo esneldáu y dempués d’esposiciones enllargaes, puede causar graves efeutos sobro la salú humana, yá que afeuta al sistema nerviosu central y a la normal producción de célules sanguínees, puede deteriorar el sistema inmunitariu y estropiar el material xenéticu celular, lo que de la mesma puede aniciar determinaos tipos de cáncanu (leucemia) o malformaciones conxénites.

Amás de presentar los peores valores de bencenu de toa Asturies, esta selmana tamién s’apreció un picu desaxeradamente alzáu nes partícules de menos de 10 micres, llegándo a los  190 µg/m3 na estación de Trubía, 175 pùntos percima de los  15 µg/m3 de media añal aceutables pa la salú humana.

Les partícules de menos de 10 micrómetros de diámetru pueden enfusar fondamente nos pulmones y provocar problemes respiratorios, como irritación nes víes aérees, tos o dificultá p’alendar.

Nel Protocolu pa Episodios de Contaminación, el Principáu nun incluyó nin el canceríxenu bencenu nin los “picos” de dengún contaminante, a pesar de la gravedá que el investigadores y médicos atribúin a estes situaciones d’altes concentraciones puntuales de los contaminantes.

This work is licensed under a Creative Commons Attribution 4.0 International License.