Esta variedá d’ocalitu podría colonizar les zones más altes del Cordal, espardiendo l’andaz del ocalitu y la deforestación ya incendios consiguientes per toa Asturies

Na planificación forestal ellaborada nel añu 2001 y con validez hasta’l 2060 poníase como tope pa la superficie d’ocalitos les 61.838 hectárees, cifra que yá se superó y  poro tendría de ponese frenu a los plantíos con cualquier tipu d’ocalitu. Sicasí’l Gobiernu de Asturies, cómpliz de la papelera de Navia, fai xustu tolo contrario y propónse autorizar el plantíu d’una de les especies d’ocalitos más agresives qu’esisten pola so capacidá d’adaptación y colonización d’espacios, el nitens, tal comu anunció’l Conseyeru de Mediu Rural  na Xunta Xeneral.

Los ecoloxistes sollerten de qu’autorizar el plantíu d’esta especie d’ocalitu n’Asturies supondría un de los mayores atentaos ecolóxicos a los montes y la biodiversidá del nuesu país en décades. L’ocalitu ye la especie más abondosa perbaxo los 400 metros d’altitú, non asina nel restu de montes porque la especie esistente hasta agora, el eucalyptus globulus, nun puede espolletar percima d’esa altitú. Ello dexó que les zones altes del cordal llibrárense d’estos plantíos. Sicasí cola autorización de llantar nitens, una especie afecha al altor y les xelaes, la menacia de qu’esta especie forana ya invasora algame a toles zones montascoses del interior ye más real que nunca. Non solo la mariña puede acabar siendo un monte continuu d’ocalitales, como asocede anguañu, si non tamién el restu d’Asturies al cabu de non munchos años. El nitens al igual qu’el globulus tien un fuerte impactu nel mediu ambiente porque deteriora’l suelu, consume una gran cantidá d’agua, aumenta’l riesgu de quemes, amenorga notablemente la biodiversidá y emprobez el paisaxe.

La declaración del Conseyeru Alejandro Calvo llama l’atención tamién porque entá nun s’aprobó’l cambéu del Plan Forestal nin se respondió de forma motivada a los allegamientos presentaos al mesmu per parte de distintos colectivos.

Redaición InfoAsturies

This work is licensed under a Creative Commons Attribution 4.0 International License.