Esti ye’l segundu añu nel que se cellebra istitucionalmente un díe que, siendo de les más importantes pa la hestoria d’Asturies, pasare décades condergada prauticamente al escaezu, remembrada namás polos homenaxes y declaraciones añales colos qu’Andecha Astur caltuvo viva la memoria d’una fecha, el 25 mayu de 1808, y unos fechos, la reconocencia por parte la Xunta Xeneral de la soberanía popular de les asturianes y asturianos, declarándose soberana, formando l’Exércitu Defensivu Asturianu, dotándose d’embaxaores d’Asturies qu’unvió al Reinu Xuníu, declarando la guerra a Napoleón, aniciando tribunales propios, istitucionalizando la bandera d’Asturies y collaborando col Pueblu Asturianu na defensa’l País Astur y na escoyeta’l so futuru.

Foi tamién Andecha Astur quien reclamó añu tres añu la cellebración oficial d’esta fecha, polo que consideren nesi sen que la mesma ye un trunfu, pero acusen a Barbón de folclorizar esta fecha col “día de la bandera”, remanando al so interés los contenios políticos de los fechos y tapeciendo’l fechu fundamental: la Declaración de Soberanía del Pueblu Asturianu.

Ello asina Andecha Astur reitera les sos propuestes pa cellebrar istitucionalmente la Declaración de Soberania del 25 Mayu pa que se garantice la dinidá d’esti díe. Eses midies, que foron tramitaes pola Xunta Xeneral en 2021, incluin amás de la declaración del  25 mayu de ca añu comu fecha de necesaria cellebración istitucional por parte Gobiernu d’Asturies y la Xunta Xeneral, la visita istitucional d’esta cabera a la Sala Capitular d’Uviéu, onde asocedió la hestórica declaración de soberanía, y qu’esta permaneza abierta al públicu pa la so conocencia y reconocimientu.

Nuria Prendes