L’espíritu que guió a los asturianos el 25 de Mayu del 1808 sigui vixente dafechu, siendo urxente la xunidá del Pueblu Asturianu frente al enemigu común nuna Asturies que s’enfrenta a ún de los piores periodos de la so hestoria

El 9 de mayu de 1808 aportaron a Uviéu les órdenes pa sometese a la ocupación francesa y la noticia del fusilamientu de dellos asturianos nel 2 de mayu, lo que prevocó la indignación de los asturianos que presionaron a los diputaos de la Xunta Xeneral a rebelase frente al poder francés.
Ante les vacilaciones de los diputaos, el pueblu pasó a movilizase ya’l 25 de Mayu de 1808 campesinos ya estudiantes entraben armaos na capital, depués d’asaltar la fábrica d’Armes d’Uviéu, sofitando la declaración de la Xunta comu Soberana.

Nesta declaración la Xunta Xeneral d’Asturies reconoz esplicitamente la soberanía popular asturiana, xurando caún de los sos componentes que “ El poder, tol poder, reside y procede del pueblu”, y declarando en consecuencia la soberanía ya independencia d’Asturies, no que costitúi’l primer actu d’autodetermín d’Asturies na dómina contemporánia.

Asturies rebélase entós escontra les tropes franceses qu’invadieren el país, asumiendo tolos atributos d’un estáu soberanu, talos como la bandera, exércitu propiu (l’Exércitu Defensivu Asturianu, con 30.000 homes de tolos conceyos) ministerios y embaxadores, consiguiendo  l’Exércitu Defensivu Asturianu al traviés del unvíu d’embaxadores el sofitu d’Inglaterra, qu’apurrió material de guerra pa lluchar escontra les tropes de Napoleón.

Esta Xunta gobierna demientres un periodu de cuasique un añu la istitución política dirixente del país, ensin interferencia d’istituciones foriates. De magar el 25 de Mayu y fasta qu’esa soberanía-y fore arrincada pola fuercia les armes, Asturies foi una estatalidá dafechu soberana, articulando unes cadarmes polítiques y militares al marxe de cualesquier marcu español. esta fecha, amás, crease la primer versión de la bandera d’Asturies, diseñada por Xovellanos perasemeyada a l’actual, que llevaba la cruz de la victoria y el llema “Asturies xamás vencida”. N’aquella España entá nun tinía más bandera que’l pendón exclusivamente militar.

Cuando al otru añu una intervención militar punxo fin a la Xunta Soberana, la llinia argumental de Xovellanos na so defensa foi el fechu de que la Xunta asturiana ye preesistente a la española, porque tien sieglos d’antigüedá, y polo tantu aquella nun tien autoridá pa disolvela, pero nun consiguió con ello caltener la nuesa soberanía.

Dende la estaya nacionaliega aporfien en qu’esa puerte sigue abierta y  ente l’actual situación d’esfarrape económicu, cultural, social y demográficu que carez Asturies Andecha Astur fae un llamáu urxente xuncir esfuercios nun frente común que defendan los llexítimos drechos ya intereses presonales y colleutivos de les asturianes/os, énte les polítiques del Estáu español.

Nuria Prendes

This work is licensed under a Creative Commons Attribution 4.0 International License.