“El SESPA acaba cola mio vocación” rezaba una de les pancartes nel manifestamientu d’ayeri, que percorrió los pasiellos y los esteriores del HUCA revindicando unes condiciones llaborales dignes. “Fartes, esclavizaes y machacaes” declaraba otra.

Dos años desixiéndose-yos más de lo asumible col covid, que topó a una sanidá asturiana ya en males condiciones, negándose-yos la conciliación familiar (a quien-y la concedan va sofrir “moving”), mareando colos horarios … y agora toles hores trabayaes de más l’añu pasáu yá nun ye que nun yos les paguen, ye que yos les “recompensen” quitándoyos festivos y nueches pero ensin pagar, lo que ye lo mesmo que quitayos  más de 200 € del sueldu. Eso, xunto cola desorganización de los turnos de vacaciones foi el detonante que llevó a les enfermeres y enfermeros asturianos a protestar pola llaceriosa situación que viven a diariu.

“Asina paga Barbón y el PSOE a los que mos xugamos la vida en primera llinia” declaraba un de los más de 200 enfermeros y enfermeres que se manifestaben ayeri frente al HUCA. Problemes pa pidir redución de xornada, saber cuando descansen o tienen vacaciones, garrar díes d’asuntos propios o esfrutar los descansos que yos correspuenden, xunto colos escesos de xornada ensin retribuir, falta de personal y les menacies a aquellos que lo denuncien, debuxen el díe ente díe de los nuesos profesionales de la sanidá, que ya avisaron “esta nun sedrá la cabera protesta”.

Llucía F. Marqués