Lo qu’entamó comu una coña pente collacios finó col espardimientu d’un vidiu del músicu peles redes nel que se-y ve na plaza Les Ventes con un abanicu de VOX. De magar les imáxenes, Hevia recibió multitú de comentarios, mensaxes, insultos ya incluso menacies que lu lleven a espublizar un mensaxe esclariando l’asuntu
Va dellos dís dalgún amigu del músicu fixo circular peles redes un vídeu nel que apaez n’ una visita a la plaza toros de Les Ventes refrescándose con un abanicu que lleva‘l llogu de VOX per un lláu y una bandera del Reinu d’España pel otru. De magar entós el vidiu, que nun debiere salir de ámbetu de los más conocios, espardióse perdayuri dando llugar a interpretaciones enquivocaes, siendo pocos los que se molestaron n’entrugar primero si yera real.
“El sintíu del humor y la percepción de la ironía son los que son güei n’ esti mundu de les redes” declara’l gaiteru nel so comunicáu “Delles vegaes hasta tenemos que escribir “je, je” detrás de cualesquier gracia por si nun y-quedara clara la intención al sagaz llector. Ye cierto tamién que esi vídeo nun debería haber algamao mayor trascendencia que la d’ una broma ente collacios y non el desendolque nes redes sociales d’ una cadena de diatribes y hasta amenaces de muerte, como foi ‘l casu”.
Ablucáu por tal xolgoriu, n’ un primer momentu y por zarrar l’ episodiu, a quien m’ entrugó si yera elli realmente retrucó “-¡Coime, Paezse!”.
Pero ante la insistencia nel tema, Jose Angel Hevia quier dexar nidio que:
“Nun pertenezo nin podré pertenecer, nin toi nin taré averáu a VOX tal como amuesa, ensin dir más lloñe nin entrar n’ otres cuestiones, el fechu d’ espresame na llingua na que escribo esta nota y pola oficialidá de la cual naguo como nagüé siempre.
Asina pues, reconocío que yera burlla, pido disculpes a quienes pudieren sentise ofendíos u ofendíes. En tou casu, si los hubiere, ensin dulda serán militantes o simpatizantes de VOX, pol usu na mencionada chanza del so material promocional. El sintíu de la broma o a quién asunsañaba nun vienen al casu, nun tenía como destín les redes y nun yera, por supuestu, faltar al respetu de cualesquier partíu políticu nel marcu de la llibertá d’espresión y de la convivencia democrática”.
Agradeciendo que quienes espardieren el vidiu en cuestión espardan tamién la so rempuesta.
Redaición InfoAsturies
This work is licensed under a Creative Commons Attribution 4.0 International License.
