El consumu añal de miel de los asturianos ronda les 610 tonelaes, 120 menos de les que recueyen los apicultores asturianos

52.100 casiellos producen oficialmente les 720 tonelaes de miel que se rexistren n’Asturies, acordies los datos del Ministeriu d’Agricultura, Pesca y Alimentación. Los asturianos consumimos direutamente 610 d’eses tonelaes, correspondiendo una media de 600 gramos por persona y añu, mui lloñe de los dos kilos de media que se consume n’Europa.

Sicasí, muncho de la miel que consumen los asturianos nun provién d’Asturies. Les envasaores tiren de miel de baxa calidá, en munchos casos de procedencia estracomunitaria, polo que ye preciso que los asturianos tomen concenxa de la importancia de mirar bien la marca y la procedencia p’asegurase de que la que se merca ye miel d’Asturies, esceicional pola so calidá. La cifra de ventes de miel n’Asturies algama los 3’2 millones d’euros que sedría perpositivo que se quedaren en manes de los nuesos productores.

Ello ye más fácil dende la aprebación de la marca IXP Miel d’Asturies, pendiente de completar la certificación europea.  Cuéntase con etiquetar unes doscientes tonelaes nesti primer añu de furrulamientu de la certificación, pero de la que s’espera algamar pronto les 400. Ochenta productores pertenecen por agora al Conseyu Regulaor Miel d’Asturies.

Redaición InfoAsturies

This work is licensed under a Creative Commons Attribution 4.0 International License.