Llucía F. Marqués
Si dende Asturies nun se pon remediu cola creación d’un frente común d’asturianos, les soluciones máxiques rocambolesques seguirán aportando. La cabera sospresa vien tamién de fuera, de Vitoria, pa ser más esautos, un partíu “nacionalista, de corte moderáu y ámbetu provincial”
Los hermanos Ricardo y Aránzazu Murias son los artífices de “Grupo por Asturias”, el partíu que se presenta por Asturies siendo ayenu dafechu al país. Eso ye avezao, los partios españoles preséntense n’Asturies de contino, siendo de fechu los qu’ostentaron siempres la presidencia. La novedá ye que’l so marcu xeográficu seya Asturies n’esclusiva.
L’aparente oximorón qu’escuende la so definición, esa contradicion pente nacionaliegu y provincianu, precisa un analís un pocu más fondu pa esclariar a que “nación” se supón que se refieren. ¿Son nacionaliegos españoles? ¿vascos? dificilmente se referirán a asturianos, teniendo en cuenta l’apellíu “provincial” qu’amiesten. Echando una güeyada a les sos redes sociales, la opción más creyible ye la primera, estos asturianos d’Alava esprésense nun español perfecho.
L’anuncia nun pasaría de lo meramente aneudótico y llixeramente humillantes si nun fore polo sintomático d’una situación llaceriosa. La falta de xunidá y l’escasu sofitu que los asturianos dan a l’alternativa nacionaliega propia dexen un vacíu políticu qu’urxe enllenar y urxe que s’enllene con proyeutos asturianos, o seguirán viniendo dende onde seya -Madrí, Vitoria…- a dicinos que tenemos de facer.
This work is licensed under a Creative Commons Attribution 4.0 International License.
