Pocu importa el presupuestu asignáu a Asturies nos Presupuestos Xenerales del Estáu si sistemáticamente s’incumple y les inversiones alcordaes nun se realicen: tres de ca cincu euros enxamás nun aportaron
Asturies ocupa’l segundu puestu nel incumplimientu de les previsiones presupuestaries del Gobiernu d’España, namás detrás de Catalunya. A naide-y estraña que los meyor paraos en cuantu a execución presupuestaria foren los madrileños y castiellanos.
En total, el Gobiernu del PSOE-Podemos n’España comprometiérase nos sos presupuestos pal añu pasáu un total de 365,6 millones d’€, repartios en 15 bloques en función del destín de les perres. D’eses 15 estayes, namás en tres s’executó vraeramente’l total de la previsión (en dalguna incluso más). Nes doce otres nun se utilizaron los fondos del Estáu, rondando’l nivel d’execución pente’l 7’3 % na meyora d’equipamientos penitenciarios ya’l 92’3% nel Conseyu Superior d’Investigaciones Científiques. De media, executárense escasamente’l 40% de la prevision anicial, namás 148 millones, acordies l’informe de la Intervención Xeneral del Estáu.
L’organismu que más incumplió les sos propies previsiones p’Asturies foi el Ministeriu d’Infracadarmes y los dependientes d’elli, comu ye’l casu d’Adif, que prevía gastar n’Asturies 79,8 millones d’euros y quedó en 19,4, una execución del 24,3%, Renfe, que malpenes invirtió 6,9 millones de los 21,5 previstos, ello ye, un 32,1% o Puertos del Estáu, que namás gastó 10 millones de los 25,3 que tenía presupuestaos , un 39,4 por cientu; en conxuntu, n’Infracadarmes utilizáronse 99,7 millones de los 301,1 previstos.
Llucía F. M
This work is licensed under a Creative Commons Attribution 4.0 International License.
