Aparte de los despidos, la empresa plantega un ERE y la negociación a la baxa del conveniu coleutivu, negándose a los incrementos salariales precisos pa que los trabayaores recuperen el so poder alquisitivu

La dirección deSaint-Gobain Sekurit  plantegó ayeri al comité d’empresa la necesidá d’aplicar un espediente de regulación d’emplegu que va suponer la salida de la empresa d’un centenar de trabayadores en tol Estáu, de los que cuasi la metá, cuarenta,pertenecen a la plantiya de la planta d’Avilés, seique la cifra final ta pindia de la negociación.

La dirección nun facilitó más datos, emplazando a los sindicatos a les negociaciones que tendrán d’entamar nel plazu d’una selmana, ello ye, de magar el prósimu 9 de xunu, seique la fecha nun s’atopa zarrada.

Amás, la dirección treslladó la necesidá d’entamar un Espediente de Regulación Temporal d’Emplegu (ERTE) pa la totalidá de la plantiya que tendrá d’aplicase a lo llargo de xunu, con una duración másima de dolce díes, asina comu la urxencia de presllar un nuevu conveniu coleutivu qu’anule’l vixente.

Nesi sen la direición faló d’una reforma bien fonda, qu’incluyiría’l desaniciu de dellos beneficios sociales y la reorganizacion del trabayu “pa retrucar a les cayíes d’actividá”. Amás, direición y sindicatos discrepen sobre les medríes salariales, entantu que’l comité defende recuperar el poder alquisitivu perdíu cola inflación del últimu añu, la direición apunta nel sen contrariu.

Pa xustificar la so decisión Sekurit afirma que nun dispon na actualidá de marxe pa dar salida a la so producción. La falta demanda “ensin precedentes” nel seutor del automóvil, afalá pola cris económica y les nueves normatives mediuambientales xúnense, según la empresa, al espoxigue de los costes de fabricación asociaos a la xubía de la lluz y los materiales.

El comité intercentros de Saint-Gobain, con representación de Comisiones Obreres, UXT, CGT y CSI, emitió un comunicáu del que se deduz que nun da por bones les desplicaciones de la empresa, acusándola d’aprofitar la coxuntura del mercáu del automóvil  p’amenorgar les condiciones llaborales y sociales de los trabayadores; «la realidá ye que la empresa lleva desllocalizando l’actividá d’una manera intencional escontra mercaos de trabayu precarios».

El camín que los sindicatos apunten pa salir d’esti mal intre ye bien estremáu al propuestu pola empresa: «un apueste firme pola actividá nos centros, realizando inversiones, desendolcando nuevos productos y con un plan industrial de trabayu y fabricación de modelos de valor añedíu que garanticen l’actividá de la plantiya».

Una bones dispongan de más información fadránse asamblees nos cientros de trabayu, avanzando que’l problema afeuta a tola plantiya de Saint-Gobain, entantu dende la empresa llamen a la desxunión de los trabayaores, llanzando’l mensaxe de que la situación d’esta estaya nun ye treslladable al restu y poro deberíen caltenese al marxe.

Amás, CSI responsabiliza a la dirección del grupu d’amenorgar les inversiones n’Avilés y llama a la movilización de tola plantiya pa consiguir caltener l’actividá industrial en La Maruca.