El reconocimientu y proteición ye urxente pola presencia de buscaores d’ayalgues na fastera, que podríen tar faciendo un espoliu de los materiales del xacimientu

Foi un vecín de La Evernal (Samartín del Rei Aureliu), Lluis Prieto, quien informó n’abril del 2021 de la presencia d’un posible castru nos alrodios del so pueblu. Los topónimos y les lliendes de la fastera foron el primer ñiciu que llevó a facer un modelu dixital con datos LIDAR, que costató la sospecha. L’informe foi entregáu a la Conseyería de Cultura y a la Casa Conceyu. De magar entós la obligación de les autoridaes, alcordies la Llei de Padremuñu, ye protexer l’enclave. Sicasí, naide punxo medios y al cabu un tiempu denunciose la presencia d’un vecín que, a la gueta les ayalgues de los moros, fexere escavaciones pela so cuenta, enllenando con escombru los fosos que delataben la presencia del castru. Ante la denuncia presentá, la rempuesta foi que’l llugar “nun taba declaráu xacimientu arqueolóxicu”.

La Lley de Padremuñu señala esplicitamente que «los espacios arqueolóxicos son llugares nos que, por evidencies materiales, por antecedentes hestóricos, por toponimia, por tradiciones orales significatives o por otros indicios físicos, materiales o documentales, se presume la esistencia d’un xacimientu arqueolócicu», siendo ello que’n La Evernal cúmplense tolos requisitos, pesi a lo que Cultura, col so avezáu desapegu a los resclavos de la hestoria d’Asturies, ñega la so proteición.

Arqueoatur, coleutivu dedicáu a guetar y documentar fortaleces y castros per toa Asturies preséntase comu defensora d’esti castru, reclamando a l’alministración asturiana la debida proteición y denunciando la so dexación de funciones.