Dos de los clús esportivos más veteranos d’Asturies xunen esfuercios pa ufrir meyores a los socios d’ambos
L’alcuerdu pente’l Grupu Cultura Covadonga y l’Asociación Montañera Astur Torrecerredo lleva tiempu xestándose col envís de que les dos partes se beneficien y ufrir más actividaes y medios a los socios de los dos clús.
Asina, de magar la robla del alcuerdu el pasáu llunes, los socios d’un y otru clú podrán participar nes actividaes y salies a la montaña programaes pol otru n’igualdá de condiciones colos socios del clú organizaor, col únicu requisitu por parte d’ambes partes de tar en posesión de la llicencia federativa ya iscribise con fecha tope del xueves de la mesma selmana na que se realice l’actividá.
Ello abre tamién les puertes de la Escuela de Montaña Torrecerredo/FEMPA a tola reciella y mocedá que seyan socios del Covadonga, pudiendo participar en toles actividaes qu’esta escuela desendolca a lo llargo l’añu y que tan pensaes p’averar a los rapacinos d’ente 8 y 18 años a los esportes de montaña.
Aparte d’ello, los socios del RGCC podrán utilizar el Refuxu que’l Torrecerredo tien na urbanización de La Raya, nel Puertu Braña, pente los meses d’ochobre a mayu.
This work is licensed under a Creative Commons Attribution 4.0 International License.
