Los llagares asturianos lleven meses pidiendo a Barbón qu’aplique la midía de sovencionar la conversión del escedente de sidre en vinagre, pero sedrán los vascos los que cobren del so Gobiernu de los diez millones destinaos a paliar los efeutos de l’andanciu

Esti mesmu martes, coincidiendo cuasi cola presentación de la campaña de branu de los llagareros vascos, féxose l’anuncia de l’activación de la llinia d’aides estraordinaries “pa equillibrar la oferta de mercáu y permitir el caltenimientu de l’actividá y de los emplegos nel sector”, reconociendo que foi especialmente afeutáu pol preslle de la hostelería y la suspensión d’eventos. Nesi sen, el Gobiernu vascu destina 10 millones p’aidar al seutor de les bébores ellaboraes n’Euskadi, facilitando la retirada de los stocks ensin consumir por mor del andanciu. La modalidá d’aida sedrá la sovención a fondu perdíu.

Nel casu de la sidre asturiana, l’efeutu ye mayor asgaya, una bones el consumu avezáu tanto en chigres comu n’espiches y fiestes de práu ye munchísimo más eleváu y poro, foron millones los llitros de sidre que quedaron nos toneles demientres el confinamientu. Pente les midies presentaes al Gobiernu d’Asturies polos llagareros pa paliar l’efeutu d’esta falta de consumu alcontrábase, precisamente, la demanda d’una sovención que permitiere la comercialización d’esi escedente comu vinagre, demanda que nun recibió rempuesta por parte l’executivu asturianu.

Ye de temer que d’equí a unos años haiga xente que s’entrugue comu los llagares vascos pudieron medrar tantu entantu n’Asturies foren presllando. Pidan-y cuentes al presidente.