Les recientes declaraciones de Jose Luis Álvarez Almeida agraven la tensión nun seutor nel que los trabayaores fuxen en desbandada a la gueta de trabayos con condiciones menos precaries
“Na hostelería nin se cobra menos nin se faen más hores estres” declaró Almeida, refiriéndose a unos trabayaores que tienen asumios los contratos “4, 8, 12”, ello ye, que son contrataos por cuatro hores, pagaos por ocho y trabayen 12… cuando hai suerte y nun s’allarga la xornada n’etenres hores estres que cuasique nunca se paguen.
Nos caberos tiempos son avezaes les quexes por parte de los empresarios hosteleros pola falta de man d’obra. Pel so lláu, los trabayaores d’hostelería devuelven la quexa: lo que falta son emplegos bien pagaos. Y con bien pagaos quieren decir que s’alloñen de la esclavitú, nun seutor nel que la conciliación familiar ye imposible y saber a que hora se sal de trabayar un suañu.
Nun se trata namás d’ufrir bonos salarios, trátase de respetar un conveniu que, si bien con 11 años ye obsoletu, a lo menos reconocía unos drechos básicos, incluyendo descansos y hores másimes de trabayu.
“D’una crisis salse namás con carecimientu y enfotu” declaró tamién l’empresariu, “La xente tien que tener ganes de trabayar, de nun ser asina tou se complica” llamenta. Tamién propón como solución a les llargues xornaes retomar los horarios pospandemia, alantrando les cenes y la hora de preslle, en llugar de contratar dos turnos de trabayaores, ya que cuando se forciaron esos horarios por motivos sanitarios “la xente malpenes protestó”.
Toes estes declaraciones apunten bien a les intenciones de la patronal hostelera y de xuru nun van animar a la mocedá a trabayar n’hostelería.
This work is licensed under a Creative Commons Attribution 4.0 International License.
