Zapatero garantizó a entamos de mileniu qu’en 2009 Uviéu y Llión taríen xuníos pol AVE en 35 minutos, dos hores y cuartu dende Madrí. La variante permitiría a Asturies, declaró l’entós Presidente d’España ya d’aquella, recuperar el tiempu perdíu. La Ministra de Tresportes comprométese agora con Barbón a que l’AVE aportará a Asturies en Mayu del 2023. Nin siquier son orixinales nes sos promeses

Nel so conceyu col Presidente de la Xunta, Raquel Sánchez, Ministra Española de Tresportes, anunció a Adrián Barbón el so compromisu pa que l’AVE aporte a Asturies nel añu 2023, tratando vender como un ésitu la posibilidá de que, con suerte, la obra de la variante fine con catorce años de retrasu sobre la promesa fecha por Zapatero nel 2004.

De fechu, la hestoria d’esta obra entamaba nel añu 1979, cuando ya se consideraba obsoleta la rampla de Payares qu’entá mos xune cola Meseta, nagurada nel 1884. La primer fecha de finalización prevista taba fechada pal 1989, con un presupuestu d’ente 40.000 y 50.000 millones de les antigües pesetes, unos 270 millones d’euros. L’erru de cálculu foi bultable, 33 años y más de 3.000 millones d’euros.

Sicasí, Adrián Barbón echa man de la so habilidá mediática pa vender esi desastre comu un ésitu de la so alministración, anunciando con arguyu la promesa de la Ministra. A ver si a la enésima va la vencía o si tampocu ye d’esta.

Llucía F. Marqués

This work is licensed under a Creative Commons Attribution 4.0 International License.