Los 40 vecinos del pueblu de Tarna, a más de mil metros d’altor, lleven más d’un mes ensin rede telefónica -nin fixo nin móvil- ya ensin interné. Nun hai forma de llamar al 112 en casu d’emerxencia, nun pueden contautar coles sos families, nun pueden facer pidíos nin xestiones a distancia, los negocios pierden los sos clientes … la comunicación col esterior pasa necesariamente pola carretera. Fai falta caminar 10 km pa topar cobertura y fasta agora les reclamaciones nun foron retrucaes nin pola alministración nin poles compañies telefóniques.

Nun ye l’únicu inconveniente que tien vivir nun de los pueblos de montaña d’Asturies. A la escasez de servicios públicos (que precisamente podía atenuase cola atención telefónica y virtual) súmase los cortes de lluz y de carretera n’iviernu. Con ello asina ye abegoso que nueves families decidan dir a poblar el pueblu, recostruyíu depués de que l’aviación española nun dexare piedra enriba piedra nel 36. Tampocu ye fácil seguir viviendo allí pa los vecinos, d’edaes avanzaes, que nun se pueden permitir nun tener forma de llamar a una ambulancia en casu de necesidá. Con ello, la estratexa de despoblamientu y desaniciu puesta en marcha polos socesivos gobiernos del PSOE n’Asturies continúa’l so camín, acelerando’l vaciáu d’un pueblu más.

Nuria Prendes