Oskar Matute, Mertxe Aizpurua y Bel Pozueta, d’EH Bildu, organización venceyada a Andecha Astur pola coalición Agora Repúbliques, recibieron ayeri a les puertes del Congresu los Diputaos a les delegaciones de 14 empreses asturianes qu’agora mesmo tan en llucha poles sos condiciones llaborales o incluso pola conservación del so puestu de trabayu

Llamentando nun poder dedica-yos a los trabayaores tantu tiempu comu a ellos yos hubiere prestao, por obligaciones parllamentaries ineludibles, los tres diputaos escucharon les sos reclamaciones empresa a empresa, tomando nota de tou ello. Amás, recibieron d’Andecha Astur una carpeta con información concreta sobre ca conflictu, de manera que cuando presenten ante’l Gobiernu Estatal les entrugues sobro les midíes a tomar conxuntamente col d’Asturies pa reactivar la economía y la industria asturianes tengan a la so dimposición tolos datos necesarios.

Les estayes de la CSI d’ALSA, Delcom, Duro Felguera, Limpac, Vayven, Modultec, Arcelor, Danone, Vauste, Just Eat, Glovo, Llacera, Trefilería Moreda, Konecta y EBHISA tuvieron presencia direuta en Madrid, pero son munches otres les que viven una situación incaltenible pa los trabayaores. Saint Gobain, Serunión, Sad, MRT, Sespa, Vayen, el Mataeru de Xixón… el desaniciu económicu d’Asturies, que lleva años baltando les posibilidaes y condiciones llaborales del país, acelérase col tiempu y dexa tres de so un regatu de preslles, ERES y despidos incaltenible a llargu plazu y ye urxente tomar midies.

Si el Gobiernu d’Asturies nun fae na por remedialo, habrá qu’acudir a los sos xefes a desixir responsabilidaes, y eso ye lo qu’Andecha Astur ta faciendo, comu mediu de presión pa que’l “Principado” pacte un Plan Estratéxicu d’Industrialización viable.

Nuria Prendes

This work is licensed under a Creative Commons Attribution 4.0 International License.