Dende CNT acusen al Conceyu Xixón de vulnerar, de factu, el so drechu a exercer l’actividá sindical
La Policía Llocal precintó la sede del Sindicatu d’Oficios Varios, baxo’l pretestu de la realización d’actividaes “culturales molestes”, ensin qu’esista preba o informe que ratifique esa decisión; nun hai midición de decibelios, nun hai altercaos rexistraos nel desendolcu de les actividaes nin hai dañu de denguna triba. L’acesu a los informes del espediente aportaron al sindicatu una bones espirare’l plazu d’allegaciones, agravando la situación cola indefensión de ver que nun pueden recurrir llegalmente la decisión.
La entruga equí nun ye si molestaron, sinón a quién. La llabor cultural sindicalista estorba, per se, pero más si les actividaes s’alluguen nun edificiu -mercáu polos militantes de la CNT de Xixón a entamos del sieglu XX- tan petecible inmobiliariamente comu la Casa Sindical, nel cientru mesmu de la ciodá.
Los sindicalistes ven esta maniobra comu una más nel tira y afloxa d’un conceyu que quier xunir l’espaciu de la Sindical a la operación d’especulación urbanística del Solarón, que llevó la estación de trenes fuera del cientru Xixón y quier agora lliberar espacios.
Comu rempuesta, la CNT tresllada la so llabor sindical a la Plaza Mayor, onde ufren la so asesoría llaboral pa toles persones que quieran informase de los sos drechos y comu exercelos, al tiempu que defenden el so drechu a la llibertá sindical exerciéndolu.
Llucía F. Marqués
This work is licensed under a Creative Commons Attribution 4.0 International License.
