Hores ensin pagar d’años anteriores, fasta tres años ensin vacaciones nin malpenes descansos, estabilidá nula y llamaes pa contratos por díes, de llunes a vienres pa nun pagar el festivu. Falten enfermeres pa cubrir puestos y les qu’hai esbórriense de la bolsa, naide quier trabayar neses condiciones
Pa les clíniques privaes hai enfermeres, sobren incluso, hai llista d’espera de currículums de profesionales de la sanidá a la gueta d’un contratu seriu qu’apurra, como mínimo, daqué d’estabilidá. Pa la pública non. Los tres años nos que la pandemia yos desixó trabayu costante, ensin cuasi descansos ya en situación d’altu riesgu, les enfermeres y enfermeros caltuviéronse al pie del cañón, sacando alantre a una sanidá pública que nun tuvo enxamás al altor de les necesidaes. Pasó l’andanciu y desficiéronse d’elles y ellos comu sobrantes, en munchos casos dexando hores por cobrar, ya que los escesos de xornada de los caberos años siguen pendientes de pagu.
A les que siguen trabayando úfrese-yos escesos de xornada, turnos duples o tornar a trabayar una bones xubilaes. Poro, nun ye d’estrañar que cuando se llama a una enfermera pa cubrir unes vacaciones, ufriéndose-y un contratu por díes, ensin posibilidá de continuidá y desixéndose-y que faiga’l so llabor nun ambiente de caos y falta de medios, refugue la propuesta. Nel otru lláu, la pública, con contratos indefinios y la demanda mundial de profesionales sanitarios en países con condiciones llaborales muncho más favoratibles.
Nuria Prendes
This work is licensed under a Creative Commons Attribution 4.0 International License.
