Sturgeon anuncia un referendum consultivu, con o ensin el sofitu del gobiernu británicu, nel que la entruga sedrá “¿Tien Escocia de ser un país independiente?” Nesi sen y refiriéndose a Inglaterra declaró “Ellos dicen que non y que son l’Estáu. Nos decimos que sí y somos el pueblu”
La entruga que se plantegará a los escoceses ye la mesma que se yos fizo en 2014 “¿Tien Escocia de ser un país independiente?”Sturgeon llamenta que dende Londres nun se tuvieren en cuenta dende entós los deseyos del pueblu escocés pa determinar de manera soberana el so futuru. Un referéndum d’independencia, declaró Nicola Sturgeon, ye un exerciciu democráticu dafechu y el de só tendrá llugar el 19 d’ochobre de 2023, según anunció la ministra principal demientres un discursu nel Parlamentu d’Edimburgu, nel que se recalcó que’l referendum tien de ser llegal y costitucional pa que tenga llexitimidá, destacando qu’ello nun ye una cuestión d’opinión, sinón una cuestión llegal. Nesi sen, declaróse dimpuesta a consultar col Tribunal Supremu y a negociar con Londres la organización d’esti referéndum, alvirtiendo de que nun permitirá que «la democracia escocesa seya presa de Boris Johnson o de cualquier otru primer ministru”.
Asina mesmu, espresó la so voluntá de caltener llazos cola Xunión Europea comu país independiente; remembremos que’l Brexit foi refugau pol 62% del ellectoráu escocés.
La política de los conservadores británicos ta llevando al pueblu escoces a carecer una grave situación económica, con bultable espoxigue de la probitú. Frente a ello, Escocia nun cuenta coles erbies pa desendolcar una política económica propia y pa bloquear les medies de los tories. Una situación calcao a la que se carez n’Asturies col Gobiernu Español.
Xunto a tou ello, Sturgeon reconoció que “la independencia nun ye fácil pa naide, pero darános la oportunidá de costruyir una meyor Escocia, con meyores relaciones internacionales. La independencia ye navegar col nuesu control pa facer frente al futuru”.
Dende Londres, un voceru del ministru británicu declaró que’l xefe de Gobiernu “continúa camentando que nun ye bon momentu pa falar del tema”. Albidramos que pa ellos enxamás nun va selo.
Nuria Prendes
This work is licensed under a Creative Commons Attribution 4.0 International License.
