El proyectu de Llei de Memoria democratica presenta dalgunes meyores con respectu al testu del proyectu inicial, pero entá asina pueden apreciase “linear coloraes” que nun fueron superaes y qu’impliquen la indefensión de les víctimes de la dictadura española. Siguen esistiendo víctimes de primera y de segunda categoría nel Estáu español

Foi la presión exercida pol movimientu memorialista y de víctimes del franquismu lo qu’impulsó la reforma de la Llei de Memoria Histórica, que supon delles meyores respecto al llamáu Modelu Español d’Impunidá del franquismu, incluyendo la nueva definición de víctima del franquismu, abondo más amplia, creándose un censu de les mesmes, asina comu un mapa de fueses y un Bancu d’ADN de víctimes, siendo especialmente importante l’aprobación d’un réxime sancionador énte los incumplimientos de la Llei y l’inclusión de la memoria histórica nel ámbitu educativu.

Entá asina, los déficits continuen siendo importantes, bien especialmente nel apartáu del Drechu a la Xusticia, quedando poco clara la posibilidá d’investigar y enxuiciar los crímenes de la dictadura, neto que  la viabilidá procesal de les querelles presentaes poles víctimes. La Llei d’Amnistía nin s’anula nin se deroga, nin parcial nin íntegramente, nin se recueye explícitamente la imprescriptibilidá de crímenes contra la humanidá en feches anteriores al añu 2004, fecha na que s’incluyeron nel Códigu Penal y que funciona anguaño como fecha de corte antes de la cual tou delitu considerarse prescritu.

Ello ye, que nun se garantiza’l derechu a tutela xudicial efectiva de les persones que sufrieron violaciones de derechos humanos mientres la dictadura y la Transición. La negación del Drechu a la Xusticia implica coles mesmes la imposibilidá de que los espolios patrimoniales seyan revertíos, y los daños causaos compensaos o indemnizaos.

La declaración de nulidá de les sentencies represives queda coxa tocantes a que nun se puede esixir responsabilidá patrimonial del Estáu y escarez por tantu de consecuencies xurídiques. Amás, l’Estáu fai responsable de la busca de sumíos y les exhumaciones de fueses comunes, lo que si non se uxdicializa’l procedimientu implica la destrucción de miles de pruebes de los crímenes cometíos pol franquismu.

Échase’n falta la conderga a la Ilesia Católica, que nunca pidió perdón pol sofitu emprestáu al Golpe d’Estáu y al posterior réxime, pola xustificación moral que dio de la Guerra d’España, y pola so collaboración total cola dictadura franquista.

Finalmente, resulta tamién esmolecedor la indefinición del testu, que dexa demasiaes cuestiones nel aire, pendiente de la so posterior concreción per parte del correspondiente Gobiernu.

Al tiempu, échase’n falta una reforma de la Llei de Secretos Oficiales de 1968, que torga la investigación de munchos de los crímenes cometíos.

Xicu Llamazares