La organización preve xuntar a más de 20.000 asistentes na feria de referencia d’arruelu alternativu n’Asturies
El sector del videoxuegu nel nuesu país atopase’n plenu espoxigue. Con más de 8 hores de media selmanales dedicaes al arruelu, esta industria amuésase como una de les más curioses pa años futuros. Pero la industria del
vídeoxuegu va más pallá del arruelu y ta profesionalizándose. Ca vuelta son más los equipos d’esportes lleutrónicos o esports que surden, enfrentándose en distintes lligues y torneos.
Mientres la cellebración de la décima edición de la CometCon, que va cellebrase del 2 al 4 de setiembre nel recintu Ferial Luis Adaro, van cellebrase dellos torneos de esportes de los principales videoxuegos como Valorant, Fornite, CSCO, Tekken y Super Smash Bros Ultimate, amás de la final de Clash Royale con un premiu de más de 5.000€.
Amás d’estos torneos, los asistentes van poder esfrutar de más de 150 equipos d’arruelu dixital espardios por 1000m2. Esta amplia ufierta d’arruelu rellacionáu colos videoxuegos ye posible gracies a la collaboración de PCBOX, empresa patrocinadora de CometCon.
Tamién va cuntase con asemeyaores de condución de la man de GSR Center, d’equipos de realidá virtual, y de videoconsoles de cabera xeneración PS5 y Xbox X ente otres.
CometCon va cellebrar mientres estos trés díes un gran númberu de concursos, ente los que s’atopen el Dance Arena, CometCon Talent y el Cosplay Stage. Estes actividaes van tener como oxetivu midir les capacidaes de los participantes, fomentar el talentu y partir cuantiosos premios. D’esta miente, los participantes van tener la posibilidá de baillar frente a miles de persones, llucir el so meyor cosplay delantre del públicu, cantar ya interpretar
los sos cantares favoritos.
Nesta décima edición tamién podrá esfrutase de talleres y actividaes onde los asistentes van poner en práctica tou tipu de disciplines artístiques y artesanales. Fiel al espíritu de la CometCon, estremaes disciplines y temátiques van tar presentes cuntando asina con actividaes rellacionaes cola caligrafía, baille, pintáu de miniatures,
bixutería y talleres pa la reciella, pente otres.
Les entraes podrán adquirise digitalmente en www.cometcon.org o bien na mesma taquilla del eventu.
Alberto Rodríguez
This work is licensed under a Creative Commons Attribution 4.0 International License.
