La Guarida del Cunqueiru de Trabáu fabrica esti recipiente artesanal que’l festival de música Prestosu Fest y la marca Puru Remangu tán promocionando
El 4, 5 y 6 d’agostu celébrase en Xedré (Cangas) la quinta edición del festival de música independiente Prestoso Fest, eventu que tien na so filosofía l’apueste pola cultura nel mundu rural. Esti añu plantegaron-y una collaboración a la marca Puru Remangu pa qu’esta sumara la so visión en defensa de la cultura y la identidá asturiana. El resultáu ye la
fabricación, puesta a la venta y la publicación en redes sociales d’una serie de videos pa reivindicar l’usu d’un iconu del suroccidente asturianu: el cachu de vinu.
«El cachu ye desconocíu pa munches de nós, por eso quisimos reivindicar el so usu y la importancia que tien na cultura d’esta tierra. Ye un recipiente de madera pa beber vinu, fechu a mano de manera artesanal nun tornu de pedal. Ye una pieza milenaria, sostenible y de les que duren pa tola vida… ¡una ayalga!», comenten dende Puru Remangu pa presentar esti productu. Tamién sorrayen que «mercando esti cachu tas sofitando l’artesanía, la cultura de los pueblos, la sostenibilidá y faciendo por qu’una tradición nun desapaeza».
Pa desendolcar el proyectu, Puru Remangu y Prestoso Fest involucraron a un tercer pegoyu nesta campaña: La Guarida del Cunqueiru. Nesti espaciu ecoturísticu que tien tienda y taller y que ta asitiáu nel pueblu de Trabáu (Degaña), fabricáronse artesanalmente los cachos.
Amás los sos responsables, Rosa y Víctor, falen nuna serie de videos de lo que ye un cachu, de cómo se fabrica, de la cultura de compartir, de sostenibilidá o de la importancia del mundu rural y de l’artesanía. Estes pieces d’un minutu pueden vese nel Instagram de Puru Remangu -onde yá algamaron más de 50.000 reproducciones- o na canal de YouTube de Prestoso Fest.
¡Afáite a Cangas!
La promoción del cachu nun ye la única acción que Prestoso Fest y Puru Remangu faen conxuntamente pa la edición 2022 del festival. Tamién editaron una carta de bienvenida pa entregar a tola xente que vaiga al eventu. Tán fabricaes en papel de semilles -pa que puean plantase y asina neutralizar la buelga de co2- y nelles fálase de coses como la música, la cultura popular y la llingua de la zona, incluyendo pallabres na variante suroccidental del
idioma gracies a la collaboración del Serviciu de Normalización L.lingüística de Cangas. Con esta acción quier potenciase que la xente que vaiga al Prestoso -principalmente, de fuera d’Asturies- conoza meyor la cultura autóctona y respete l’entornu rural nel que se fai.
This work is licensed under a Creative Commons Attribution 4.0 International License.
