El Festival Intercélticu d’An Oriant ye un escaparate pal mundu de toles cultures y diáspores venceyaes al mundu celta. Como nun podía ser d’otra manera, nesta edición tan especial dedicada al nuesu país, toca poner la mirada nel imaxinariu asturianu de la mano de Ricardo Villoria, cola so esposición “Llabor”. Villoria amesta equí tradiciones escaecíes o a puntu de perderse, indumentaria y llabores del pueblu pa intentar recoyer la cultura dempués del pieslle de les mayores industries. Les semeyes más impresionantes de la esposición son les reinterpretaciones col traxe del país o variaciones del mesmu, amestando elementos modernos y sensuales como’l látex, los tacones de plataforma y les mázcares. Dalgunes pieces, como’l corsé de terciopelo prieto con azabache que domina delles obres, tán tamién presentes y pueden desaminase de cerca. Amás de la fotografía, Villoria trae tamién símbolos de lo rural que tán a piques de desapaecer y que son símbolu de l’Asturies rural que tuvo qu’incorporar el trabayu na industria a l’agricultura de subsistencia. Tal ye’l casu d’una rueda de tractor, magar que non estrañu dafechu a la nuesa xeografía sentimental, o un sábanu d’herba seco pa echar nel payar. Por último, la esposición cuenta con dos pieces audiovisuales. El llavianu enllena l’espaciu con grabaciones en primer planu de cinco cantantes de tonada asturiana: Mari Luz Cristóbal, Celestino Rozada, Adelita Fernández, Juan Robledo y Lorena Corripio. Les cares, que se combinen en triaes y van rotando, canten una al tiempu. Al llau ta’l vidéu d’un Samartín completa, dende la llimpieza del gochu hasta’l despiece: en combinación, xenera una atmósfera d’intimidá que mueve a recordar esperiencies propies o ayenes. Ta nidio que Ricardo Villoria promete una nueva mirada sobre Asturies que nun se pue perder en prósimos trabayos. Dende equí, damos la norabona al artista.