Rodrigo Cuevas pon de rodíes el Festival Intercélticu de Lorient

11 Agostu, 2022

El ganador del Camaretá al Meyor Cantar revolvió les emociones del públicu bretón na sala Le Kleub

Apuestes musicales novedoses pero venceyaes a la tradición celta. Esa ye la máxima de Le Kleub, una espaciu nuevu del veteranu festival de Morbihan que ye l’alternativa a les discoteques. Nestes feches pasen peles tables L-R, Plantec y munchos otros artistes. El domingu 7 d’agostu, día grande pol desfile de les naciones celtes, remató na sala col conciertu de Rodrigo Cuevas, ganador del Camaretá al Meyor Cantar por ‘Rambalín’, una apueste rompedora. L’axitador folclóricu averó’l Trópicu de Covadonga, el so espectáculu, a tolos asistentes. En mediu del públicu, comezó a afalar cómo namái se pierde lo que nun se cuenta, pa siguir darréu colos sos cantares de ronda de tradición castellana, ‘Arboleda bien plantada’, ‘Ronda de Robledo de Sanabria’, ‘El día que nací yo’ y ‘Muerte en Motilleja’. Y ye que desplicar cómo tamos deshumanizando crear vínculos y vivir la nuesa sexualidá en francés tien méritu, pero pocos son a falar con exemplos pa que s’entienda dafechu.

¿Quién quier Tinder, teniendo cancios asina? Sicasí, tolos que queríen cortexar colo asturiano como escusa nun quedaron a disgustu. Bien ceo salió’l perréu arriesgáu del ‘Xiringüelu’, siguío d’una vaqueirada onde Cuevas llamaba a la concurrencia a “glayar como glayaben les vueses güeles”, una referencia de sensualidá y espresión seductora pa les nueves xeneraciones que viven no dixital. Hubo tamién tiempu pa ponerse reivindicativos y reclamar la oficialidá de la nuesa llingua, asina como símbolos esenciales pola llibertá identitaria y sexual del país. Como nun podía ser menos, ‘Rambalín’ salió al escenariu, y a casi 50 años del so asesinatu, respigó y emocionó al públicu. Pero nun hai romería asturiana ensin baille. Pa presllar la sesión y dexar el pabellón bien altu, remató col únicu canciu en gallegu del so discu, ‘Muiñeira para a fila da bruxa’, onde hasta los representantes de la delegación, del públicu y de los grupos del festival diéronlo too. Ensin dubia, una de les nueches lorienteses pa nun escaecer.