Cuatro poetes de les últimes xeneraciones llíriques asturianes comparten col públicu del Festival Intercélticu de Lorient los sos versos

El Festival Intercélticu de Lorient va enfrentándose a les últimes xornaes de la edición 2022, añu dedicáu a Asturies. Sicasí, nun implica qu’heba menos actos interesantes o que la nuesa representación mengüe. Por haber, hasta la poesía na nuesa llingua tien un espaciu bien prestosu.

Dientro de les actividaes programaes pol Festival, la Delegación y la Conseyería de Cultura, Política Llingüística y Turismu d’Asturies tán les llectures en llingua asturiana d’escritores representativos de les nueses lletres: Xaime Martínez, María García, Pablo X. Suárez y Solinca Turbón, acompañaos pol direutor de Política Llingüística Antón García, van compartir estos díes colos asistentes al festival los sos versos.

El por qué acudir estes persones y non otres tien una razón de ser mui cenciella: “Queríemos qu’acudieren autores nacíos de 1980 n’alantre, dos homes y dos muyeres, con una obra representativa de los nuevos esmolecimientos na poesía asturiana, publicaos nos últimos años y con una vida cultural activa”, dixo Antón García nel actu inaugural.

Tres esto, les nueves xeneraciones garraron el micrófonu pa compartir la so poesía. Xaime Martínez compartió tanto fragmentos del so primer poemariu n’asturianu, Hibernia (Saltadera, 2017), sobre los vínculos ente Irlanda y Asturies, como un inéditu inspiráu nel cuadru Conciencia tranquila de Julio Romero de Torres. María García centróse nos versos de Ye capital tolo que fluye (Ultramarinos, 2021), un llibru onde esplora cómo s’hermanen comunidaes con llingua propia nun mundu que pon nel centru’l porgüeyu económicu y non la vida. Solinca Turbón traxo los poemes de Reflexones d’un cuerpu opacu (Trabe, 2020), onde trata dende’l desamor, los recuerdos de la neñez y la problemática millennial. Por último, el rapsoda Pablo X. Suárez lleó dos inéditos d’Entamos d’onomástica, un poemariu qu’esperamos ver publicáu bien pronto, sobre’l pueblu de Piñeres y Finlandia, escribiendo dende’l conocimientu y el desconocimientu posicionáu.

Esti vienres 12 y sábadu 13 d’agostu les llectures tendrán llugar nel espaciu Jardins del Hôtel Gabriel, n’horariu de tarde (18:45, orientativu).

Aymara Glez Montoto

This work is licensed under a Creative Commons Attribution 4.0 International License.