La plaza Conceyu de Casu acoyó esti sábadu la XXVII edición del Quesu Casín, la feria que festexa el que ye un de los quesos más antiguos del mundiu y que fasta nun va muncho taba reserváu pal consumu familiar. Fechu tradicionalmente poles casines, foron elles les qu’entamaron a da-y puxu, comercializalu y llevalu a feries queseres, col resultáu evidente: el quesu casín gusta, véndese. La produción del añu 2021 foi de 43.000 pieces de cuartu kilu, pero la previsión del 2022 ye de comercializar 60.000, de les que ya se vendieron el primer millar esti sábadu. Nel certame, les tres queseríes de la DOP Quesu Casín – Redes, La Corte y Ca Llechi- esgotaron les esistencies.

La noticia d’esti espoxigue nun ye namás bona pa los queseros, sinón tamién pa los ganaeros de raza casina, ya qu’estos quesos faense dafechu cola llechi de vaques d’esta raza, que si bien nun ye una gran productora si que tien una llechi con unes carauterístiques que dan al Quesu Casín el so toque únicu.

El retu que tienen agora en Casu ye llevar el so quesu a tola hostelería asturiana, asina comu internacionalizar el so productu esportándolu fuera d’Asturies.