Asturies ye el principal focu d’orixen de mercancies del Estáu en términos de carga, acordies el caberu informa añal del seutor ellaboráu pola Comisión Nacional de los Mercaos y la Competencia, con datos del 2020
Nesi añu, Asturies foi orixen de 2’4 millones de tonelaes y destín d’otru millón, si bien ye cierto qu’eses cifres son un 34’4% menores que los del añu anterior, por mor de la descarbonización.
Sicasí, Asturies queda fuera del plan ellaboráu pol Gobiernu Cientral pa meyorar el tráficu de mercancies por via ferroviaria. España subvencionará a les empreses, dixitalizará el tresporte, adaptará les infracadarmes, habilitará terminales y desplegará les autopistes ferroviaries, conesiones nes que los galibos de los túneles ya’l suelu de los vagones ten adautaos de tala mena que’l convoi lleve traíleres enteros o el semirremolque. Asturies, xunto con Galicia, Cantabria y Estremadura, queda fuera d’eses meyores.
La emportancia de les autopistes ferroviaries radica en que permiten la movilidá de les mercancies cargaes en camiones, moviéndo estos nos sos vagones ensin necesidá de posar la carga, daqué perinteresante pa que los camioneros pudieren esquivar el pasu del Güerna per carretera ya’l so consiguiente peaxe.
Más de la metá de los itinerarios que recibirán la meyora tienen a Madrid comu puntu d’orixen y destín.
Nuria Prendes
This work is licensed under a Creative Commons Attribution 4.0 International License.
