“Si nun llego a ser familiar d’un enfermeru del HUCA, taba muerta. Lo que me lleva a camentar que ta morriendo xente y que va morrer xente pola falta medios y personal na Sanidá Pública Asturiana“. La hestoria de C.M.C, enferma con un mioma va dos años, valnos pa illustrar la situación de la sanidá pública asturiana

Soi una muyer de 50 años que llevaba careciendo metrorraxes mientres 2 años (y a siguimientu de xinecoloxía, nun pueden alegar desconocimientu). Hasta que los mios niveles d’hemoglobina baxaron tantu que la mio mélica de familia diome la IT y remimitióme de nuevu urxente a xinecoloxía.
Dícenme que soi candidata a una intervención quirúrxica preferente por aciu radiofrecuencia, por que de esa manera nun me tengan que “balerar”.
Pasen los meses y los mios sangraos son tan abondosos que gastaba d’un a dos paquetes de compreses pospartu al día. 
Llega’l día que me siento tan feble qu’el mio home llévame a urxencies y tengo pocu más de 5 g/dl d’hemoglobina (lo mínimo son más de 12 g/dl en muyeres) y tiénen qu’ingresame. ¿Pa qué? Pa poneme unes tresfusiones de concentraos de hematíes y pa casa. Ensin solucionar nada, cuidao que les hemorraxes siguíen. Yá nesi momentu, el mio home (enfermeru del HUCA) díxome qu’eso nun yera solucionar nada sinón “parchear”, máxime cuando les xinecólogues que m’atendieron dixéronme que nun m’esmoleciera porque diben poneme como urxente para la intervención por aciu radiofrecuencia. Mentira. El mio home falara cola doctora que realiza eses intervenciones y dixéra-y que-y quitaren los quirófanos pa facelo, y a lo menos el SESPA nun-y los diba devolver como bien llueu en payares.
Nun pasa una selmana y los mios dolores y debilidá lleguen a una llende inaguantable. Vuelve llevame a urxencies el mio home y tengo pocu más de cuatro g/dl d’hemoglobina (la matrona enxamás viera una cifra tan baxa).

Cuando m’esaminen les xinecólogues, de nuevu cola romandela de la otra vegada, y ende ye cuando’l mio home identifícase como enfermeru del HUCA y diz que sabe fehacientemente que ye mentira que vaigan a intervenir por radiofrecuencia, porque elli en persona falara cola doctora que les realiza y foi quien-y dixo que’l SESPA suspendiera toos esos quirófanos. Les xinecólogues al vese “pillaes”(toi convencida que reciten el mantra que-yos ordena dicir la direción mélica, pa xustificar los descomanaos retayos en sanidá que carecemos les asturianes y asturianos) porque’l mio home ye enfermeru de dichu hospital, dicen que van falar con esa otra doctora (que nun mento’l so nome porque ye una víctima más de los retayos en sanidá fechos pol Gobiernu del señor Barbón. Si te quiten el quirófanu nun puedes operar, asina de cenciello).

Como cabía esperar, al pocu tiempu tornen dando la razón al mio home.
Desiximos soluciones y danme como opción namás que me realicen una histerectomía; naquel momentu roblara hasta que me cortaren les piernes de lo mal que m’atopaba. Ingreso en planta y magar tola medicación pautada los mios dolores son insoportables y el sangráu sigue. Gracies a la profesionalidá y persistencia de la enfermera de planta, llamando de continuu a la gueta les xinecólogues de guardia, báxenme a faer una ecografía (otra vegada, tres decenes d’elles feches), al ver más de lo mesmo, evidentemente, pídenme un angiotac urxente.
Resultáu, corriendo pal quirófanu a que me embolizasen dambes arteries uterines por que nun me sangrara.
Tres esi calvariu, inda hubo una xinecóloga que s’atrevió a proponeme l’alta “temporal” hasta que me fixeren la histerectomía “cuando tuvieren un quirófanu llibre”. El mio home yá m’avisara de que’l SESPA suel faer eses coses y depués “écha-y un galgu a la fecha de la intervención”, que me negara a l’alta si me la ufiertaben antes d’operame. Por suerte, porque tamién hai xinecólogues bones y profesionales, la siguiente que me vio dixo que del alta nin falar hasta que m’operaren, que nun diba cayer nel mesmu erru que la última vegada.
Resultáu. Lo que diba ser xuna histerectomía cenciella na que diben respetar ovarios y pescuezu uterín, terminó siendo una intervención quirúrxica na que s’atoparon el sacu de Douglas enllenu d’aguadía, un de los ovarios pa estirpar, ya inclusive la paré abdominal con necrosis (texíu muerto). Por nun falar de tou’l texíu intrabdominal que tuvieron de desbridar.
Esti foi’l mio infiernu cola sanidá que nos brinda’l señor Barbón n’Asturies, y tamién el calvariu que carecen miles de muyeres n’Asturies. Con una diferencia, que non toles muyeres tienen un home (o familiar) que trabaye nos hospitales del SESPA a quien nun puedan engañar, porque ta al tantu de tolo qu’asocede y los xabaces retayos en personal, medios y recursos que carez la sanidá pública d’Asturies.
Con too y con eso esto rellatao y carecio, teo d’estimar la profesionalidá del personal d’enfermería y ausiliares y tamién a parte los mélicos que, magar toles torgues que’l Gobiernu d’Asturies yos pon pa un correchu desempeñu de les sos funciones, faen tolo posible por garantizar un mínimu de bientar y dignidá a les/vos que carecemos estos retayos sanitarios.
Quedo con una sensación agriduz de lo que tán convirtiendo a unu de nueses más preciaes conquistes, LA SANIDÁ PÚBLICA.

This work is licensed under a Creative Commons Attribution 4.0 International License.