Declaraciones de Mariano Suárez -Andecha Astur- tres el Díi de la Nación Asturiana

21 Setiembre, 2022

“El 8 setiembre presentóse una fueya ruta pa caminar xuntos pol futuru d’Asturies, porque otra Asturies ye posible”

“L’Asturies igualitaria, social, xusta, verdi, asturiana… que toes queremos vamos costruyila xuntos en cuantes finemos col réxime adormidera de la FSA-PSOE”

Con motivu la recién cellebración del Díi de la Nación Asturiana, falamos con Mariano Suárez, mayestru escuela y miembru la Xunta Executiva d’Andecha Astur.

Esti 8 setiembre cellebróse, otra vuelta, el Díi de la Nación Asturiana. ¿Pues dicimos qué asocedió esa xorná n’Asturies?
Según lo vemos n’Andecha Astur, esi díi asocedieron polo menos cuatru fechos. El primeru ye qu’Adrián Barbón, presidente d’un Gobiernu que se diz socialista, tornó dir a Cuadonga a homildase énte un xerarca relixosu que lu reñe públicamente con discursos propios de la estrema drecha, mentantu’l presidente, escaeciendo que representa al conxuntu del Pueblu Asturianu, dexa n’evidencia que nun sabe llevar el cargu cola dinidá necesaria. El segundu socedíu foi que’l posibilismu progre español, que col nome de Podemos trabaya blanquiando al PSOE, convocó un añu más en Xixón la qu’ellos mesmos nomen “La Folixa de Podemos” pa tapecer la condición política y nacional de la xorná. La tercer rialidá que reconocemos ye qu’una mayoría de la población asturiana, afeutá pol estáu de cansanciu y apatía que xenera esti réxime-adormidera que ye la FSA-PSOE, vivió’l 8 setiembre simplemente comu una xorná de descansu, al marxe tanto de los actos oficiales del réxime comu de cualisquier rempuesta a esa casta. Y el cuartu fechu a destacar foi qu’Andecha Astur, CSI, Mocedá Comunista, JCE m-l, Asamblea Republicana d’Uviéu y FAMYR fuimos capaces de xenerar un consensu pa entamar una concentración esi 8 setiembre, énte esi vergoñosu sanedrín de la casta que se autonoma “Junta General del Principado”; foi la única rempuesta na cai que se dio esa xorná a los Gobiernos d’Uviéu y de Madrid y la única que presentó a la sociedá asturiana un discursu consensuáu que representa un alternativa con futuru p’Asturies.

D’estos cuatru socedíos yá maxinamos que te paecerá más importante’l que protagonizó Andecha Astur con otres cincu organizaciones. Pero ¿pues señalamos dalguna razón pa ello?
Sinceramente, nun ye custión d’autobombu, porque Andecha Astur ye una organización de ciudadanes normales que se compromete cola nuesa tierra, somos asturianos normales con concenxa cívica y non un preséu más del sistema. Creyemos que si se prautica un analís mínimamente oxetivu, coincidiremos nuna mesma conclusión. Per un llau descalifícase solu un presidente que tolos años se dexa azotar verbal y públicamente por un monseñor. Per otru llau nun hai dinidá nel llabor de Podemos comu peón del PSOE na desactivación de la tensión llaboral, socioeconómica, identitaria, democrática… que n’Asturies xeneren la casta, el capital y l’Estáu español. Y la permanencia duratible nun estáu d’apatía o cansanciu social nun ye una actitú sana pa nenguna sociedá, y menos pa un pueblu que, comu l’asturianu, siempres amosó tener puxu suficiente pa xenerar rempuestes colleutives coles que defender los sos drechos y pelear pol so futuru. Asina que, ciertamente, de los cuatru fechos del 8 setiembre señalamos la importancia que tuvo la concentración n’Uviéu. ¿Razones? Amás de les comentaes, hai delles más que, por supuestu, compartimos gustosamente con toos. Que, nestos tiempos de rempuesta social amenorgá pol propiu sistema, haiga un piñu d’organizaciones polítiques, sindicales y sociales que nun renuncien a dicir lo que pasa n’Asturies y a presentar les sos alternatives, ye un fechu que tien en sí mesmu un importante valor de resistencia y rexeneración democrática. Hai que destacar, amás, el valir de que los convocantes (Andecha Astur, CSI, Mocedá Comunista, JCE m-l, Asamblea Republicana d’Uviéu y FAMYR) representen ámbetos d’aición ciudadana estremaos y tamién definiciones ideolóxiques dixebraes, pero toos ellos foron capaces de sentase y entendese, conviniendo la necesidá de dar el 8 setiembre una rempuesta na cai al sistema y consensuando un documentu de convocatoria que, sinceramente, pola so importancia debería ser lleíu y relleíu por tola ciudadanía, especialmente por aquella na que valte’l deseyu d’una Asturies meyor pa toes y qu’entá se siente llamá a la costrución activa d’esa nuea Asturies.

¿Por qué te paez tan importante’l documentu consensuáu que llamó a concentrase nesti Díi de la Nación Asturiana?
En primer llugar, los convocantes coinciden en que’l 8 setiembre nun ye un díi de folixa, de santuarios, de política de salón nin d’españolíos rancios, sinón que ye’l Díi de la Nación Asturiana, una xorná vindicativa de la clas trabayaora d’esta tierra. Tamién coinciden na identificación de la cris socioeconómica, llaboral, política, demográfica, identitaria… que carez Asturies, pero nun gastaron enerxíes en llorar por esa Asturies prieta que xestiona Barbón, tres la “Junta General del Principado”. Non, non, el documentu que consensuemos señala con enfotu les posibilidaes riales de revitalizar l’Asturies roxa, verdi, violeta, multicollor… que ye posible y que queremos pal futuru inmediatu. Y, reconociendo mesmamente que’l sistema presenta una fuercia descomaná, llama a les asturianes y asturianos a reforciar les nueses tradiciones asamblearies que siempres empobinaron a la xuntanza, al llabor social compartíu, a la solidaridá pente’l pueblu, al consensu… Porque creyemos de verdá qu’otra Asturies ye posible si toes y toos nós salimos de casa, de lo individual, de l’acomodación pasiva, del desenfotu, de la delegación irresponsable de los nuesos drechos cívicos y políticos. Y dexa una fueya ruta pa poder algamar esa otra Asturies que ye posible: poner en marcha un gran conceyu abiertu nel que’l Pueblu Trabayaor Asturianu se comprometa a defender una plataforma de mínimos que garantice’l nuesu futuru comu asturianos, comu clas trabayaoray comu xente d’esquierdes. Esa xuntanza al rodiu d’unos puntos mínimos ye’l camín qu’empobina al futuru pol que naguamos.

Una vegá pasáu’l 8 setiembre, una vegá consensuáu esi documentu ¿qué hai dempués?
Pa entamar yá tenemos un consensu social anicial. Ñaz d’un númberu reducíu d’organizaciones, pero la importancia d’esti consensu nun reside tanto na cantidá de firmantes aniciales comu nel poder del mensax construyíu, na fuercia gravitatoria ñatural que tien una propuesta d’esti tipu, onde, ensin masimalismos, pue afayase tola xente que se reconoza asturiano y d’esquierdes. ¿Y qué hai dempués? Pos lo que vien agora ye facer un notable esfuerciu pa treslladar esti marcu de xuntanza, esti consensu de mínimos pol futuru d’Asturies a toles presones y organizaciones que, entendiendo que nun son tiempos de sectarismos y tampocu d’esperimentos con gaseosa d’última hora, quieran falar d’esta fueya ruta. L’oxetivu final d’esti camín que s’ufre p’andar en xuntanza nun ye elleutoralista, ye vital: ye l’entamu d’una nuea Asturies comu entornu pa la vida llibre y de calidá de toes. Sicasí, nun mos podemos engañar, esi oxetivu final desixe recurrir primero a los mecanismos del propiu sistema, de mou que per aciu la prósima convocatoria elleutoral podamos llevar a la Xunta Xeneral esa voz, esa fuercia de la cai de qu’una Asturies igualitaria, social, xusta, verdi, asturiana… ye posible. Y de xuru que la podremos costruyir xuntos en cuantes finemos col réxime adormidera de la FSA-PSOE.

Redaición InfoAsturies