El Salón Internacional de les Sidres de Gala, que tendrá llugar pente’l 29 de setiembre ya’l dos d’ochobre, ye l’únicu eventu sidreru internacional d’Asturies ya’l más importante a nivel del Estáu
Por diez euros van poder tastiase les sidres de 73 llagares internacionales
La doceava edición del SISGA ta a un pasu. El xueves 29 tendrá llugar l’actu nagural -con una tastia de sidre escocesa- y de magar entós sucederánse les actividaes sidreres coles que la Fundación Asturies XXI, entamaora d’esti eventu, lleva doce años poniendo a la sidre asturiana nel llugar que merez dientro’l panorama internacional.
El Salón Internacional de les Sidres de Gala ye un marcu únicu pa dar a conocer les variedaes de sidre que nun son d’echar, menos populares n’Asturies pero bien afayaices pa llugares ensin espacios pa echalo, como ye’l casu de restoranes, salones o pubs, revindicando un espaciu pa estes variedaes no que se considera l’alta gastronomía. Tamién ye l’únicu escaparate de les sidres del mundiu n’Asturies, una oportunidá única pa tastiar sidres perestremaes.
Dientro les actividaes d’esti eventu destaquen les tasties guiaes, nes que se dan a conocer en fondura les sidres de dellos llagares, y la Tastia Abierta al Públicu, na que por namás diez euros los asistentes podrán degustar llibremente toles sidres participantes nel eventu, vinientes de 73 llagares de 21 países estremaos . Pa conocer tol programa y les sidres que participen, recomendamos visitar la páxina del SISGA.
Nos doce años de llabor del SISGA va franciéndose la desconocencia a nivel internacional de Xixón, Asturies y la so sidre, una llabor didáutica descomanada, comu destacó Marcos Abel Fernández, Presidente de la Fundación Asturies XXI, na so intervención, ya que “les polítiques turístiques asturianes paecen nun tener güeyos más que pa Madrid” y la participación internacional tien qu’enfrentase al aisllamientu por tierra, mar y aire al que ta sometía Asturies “que fai que por exemplu, seya más facil –y barato- llegar de Chequia a Madrid que de Madrid a Asturies”. La situación internacional, amás, torgó esti añu la participación de llagares rusos y ucranos, al tiempu que’l sobrocostu en materia de tresporte y aduanes llastró el movimientu de productos “Por casu, trayer una caxa de sidre escocesa tien un costu d’unos 220 euros. Nun digamos yá cuando l’orixe son los EEXX”.
Na presentación de los actos participaron tamién Manuel Vallina, Conceyal de Cultura del Ayuntamientu Xixón, Manuel G. Busto, Presidente del Xuráu Internacional de los Premios SISGA y Mª José Fernández, Direutora del CIFP Hostelería y Turismu de Xixón, que declaró que “Si se fala d’Asturies, fálase de sidre”, aporfiando nel papel de la cultura sidrera pa visibilizar internacionalmente’l nuesu país.
Redaición InfoAsturies
This work is licensed under a Creative Commons Attribution 4.0 International License.
