5 Ochobre, 1934. El pueblu asturianu llevántase n’armes contra la República Española. Nun escaezamos quien yera -quien ye- l’enemigu
Banderes republicanes “faciendo homenaxe” a los héroes del 34, la hestoria del llevantamientu d’Asturies cuntada, nel meyor de los casos, comu una revuelta espontania y desorganizada de trabayaores famientos llamada a fracasar dende’l so entamu… l’escaezu o tracamundiu nunca ye casual. 88 años resultaron ser tiempu abondu pa que los vencedores reescribieren la hestoria al so gustu y esborriasen lo que yos estorbare, tracamundiando fechos y remanando pa si el “mitu” d’Ochobre del 34.
La Revolución d’Ochobre del 34 supunxo pal pueblu trabayaor asturianu, amás d’una demostración ablucante de valentía, un llargu y meticulosu esfuerciu de planificación organizativa, política y militar. Sólo asina foi posible que naquellos díes, ensin medios de comunicación comu los d’anguañu, pente 30.000 y 50.000 asturianes y asturianos armaos defendieren a una un oxetivu común y claru: poner en marcha darréu un nueu modelu social y económicu, sofitáu nuna Asturies socialista y soberana.
Ello surdió de la necesidá de desentendese d’una República Española que, pesi a toles promeses, caltenía los privilexos de los de siempres. El movimientu obreru asturianu tenía nidio que nun podía aspirar a vivir llibre y dinamente si Asturies siguía sometía a la monarquía española, o a una dictaúra militar comu la de Primo Rivera, o a una república española comu la Segunda. Poro, apostó por facer soberanu al Pueblu Asturianu y asumió Asturies comu marcu específicu d’actuación.
Nesos díes ñació la que se nomaría República Independiente d’Obreros y Campesinos d’Asturies, proclamá poles bases obreres, al marxe de les organizaciones polítiques españoles, y defendía pol Tercer Comité Revolucionariu, que presidió Berlarmino Tomás.
Sicasí, la llucha foi llarga, l’enemigu multiplicóse ya’l Pueblu Asturianu foi incapaz de resistir la fuercia cola que, primero la II República Española y lluéu el facismu español, s’ensañaron con Asturies.
Pero sabemos qu’anque asonsañen escaecer estos fechos, España nun escaez, nin perdona. Sabémoslo porque, de magar aquella derrota, non conformes cola la xabaz represión posterior, el pueblu asturianu vien siendo castigáu demientres cuasi nueve décades.
Carecen los asturianos d’un retayu continuu de drechos y un bombardéu inmisericorde a la so autoestima que devién nun sentimientu d’inferioridá y derrotismu incrustáu nos asturianos, del que ye difícil escapar.
L’asturianu mediu asume l’odiu faza lo propio y siéntese avergoñáu, aportando a sentir autoodiu y renegar de los sos raigaños. Porque ¿Qué desplica, si nun ye l’odiu faza lo asturiano, la prohibición mesma de daqué tan ellemental como una llingua? ¿Porqué sinon se mos priva del arguyu de conocer y estudiar a los nuesos héroes? ¿Cómo se desplica el desdexamientu y baltu del nuesu padremuñu? ¿Qu’otra esculpia hai pa la implementación, década tres década, de midies polítiques y económiques contraries a cualisquier lloxica, si nun ye la de desaniciar dafechu’l país?.
La recuperación de la Memoria Hestórica Asturiana ye imprescindible pa devolver al Pueblu Asturianu a la época en que foi valiente, capaz de lluchar y sobre tou, seguru de si mesmu y de la so propia identidá. Torna Ochobre y nun escaecemos, nun queremos escaecer.
Sabemos quienes fueron, quienes fuimos, quienes somos. Nun mos rendimos.
Nuria Prendes
This work is licensed under a Creative Commons Attribution 4.0 International License.
