SUATEA aconceyó ayeri col Direutor Xeneral d’Ordenación, Evaluación y Equidá Educativa pa conocer  la posición de l’Alministración  frente a la denuncia que la organización sindical fexere’l 23 de setiembre, referida al cambéu de les condiciones de trabayu derivaes de la medría del ratiu d’escolinos nes Aules Abiertes ensin medrar el númberu de profesoráu y ensin dalu tipu de consulta o negociación previa coles organizaciones sindicales

Les Aules Abiertes son un recursu de los colexos públicos, concebíu para la transición de los escolinos, principalmente con trestornos del espectru autista, de desendolcu o dificultaes de comunicación- a l’aula normal, fasta la escolarización completa nel so grupu d’iguales. Ye poro una midida d’atención a la diversidá pa reciella con necesidaes educatives especiales,

Anantes del conceyu SUATEA contautó con cuasi la totalidá de les 22 aules abiertes esistentes n’Asturies pa conocer de primer man la situación de les mesmes y  tresmitir al Director Xeneral, David Artime,  les principales demandes, entamando por una asignación afayaiza d’Ausiliares d’Educación dende l’entamu de cursu, pa garantizar una atención afayadiza a los escolinos, tantu de les Aules Abiertes comu de los Centros d’Educación Especial (CEE), axustando el númberu de profesionales venceyaos a l’Aula Abierta énte l’aumentu esceicional de la ratio, atendiendo al tiempu a la diversidá de situaciones y necesidaes.

Recoyeron tamién la demanda de los docentes d’axustar en mesa sectorial d’educación los cambios qu’afeuten les sos condiciones llaborales.

Poro, SUATEA desixe a la Conseyería d’Educación “que regule les midíes necesaries p’asitiar les bases d’una escuela realmente inclusiva y perdurable, lo qu’implica una dotación presupuestaria al altor d’estos oxetivos en llugar d’a costu cero, lo qu’implica la sobrecarga llaboral del profesoráu”.

Redaición InfoAsturies

.

This work is licensed under a Creative Commons Attribution 4.0 International License.