L’estudiu, ellaboráu pola Universidá d’Uviéu, va analizar cómo afeuten les viviendes d’usu turísticu al mercáu d’alquiler de vivienda habitual y comu el so usu estacional afeuta a la capacidá de les infracadarmes ya l’usu los servicios públicos xixoneses
En Xixón, les viviendes de particulares alquilaes a turistes como si d’un hotel se tratase suponen ya el 36,5% de la oferta total d’aloxamientos na ciudá. Nun conceyu con 7.000 viviendes vacíes y más de 700 dedicaes a alquiler estacional, el preciu d’alquiler de pisos comu vivienda avezá ye’l más caru d’Asturies, 576 euros mensuales de media y res por menos de 350 euros.
La influyencia del alquiler vacacional nestos precios ye una de les cuestiones que va estudiar el “Primer informe d’analís sobro l’impautu social y económicu xeneráu poles Viviendes d’Usu Turísticu (VUT) nel conceyu de Xixón. Añu 2022”. Esi ye’l títulu provisional del estudiu que’l Conceyu de Xixón encargó a la Universidá d’Uviéu p’analizar l’impautu de les VUT na ciudá. La entrega del informe ta prevista pa febreru de 2023.
Santos Tejón Llaneza, concejal de Promoción Económica, Empleo, Turismo y Comercio; Natalia González, concejala de Bienestar Social; y Loli Patón, concejala de Urbanismo, presentaron esti proyeutu na Casa Conceyu. Na presentación tamién s’afayó’l profesor de Socioloxía y responsable del equipu investigador de la Universidá d’Uviéu, Sergio González Begega.
L’envís xeneral del proyeutu ye la ellaboración d’un documentu d’informe téunicu sobro la situación de les VUT nel conceyu de Xixón, con atención especial nes sos implicaciones sociales y económiques. La finalidá del documentu d’informe téunicu ye orientar llinies posibles d’actuación en materia de política pública municipal. El proyeutu va dar a los téunicos del Ayuntamientu de Xixón un fundamentu empíricu pa orientar les decisiones de xestión de la VUT, respondiendo asina a les perspeutives de crecimientu d’esta ufierta d’agospiu nos años vinientes.
L’equipu investigador del proyeutu va tar compuestu pol profesor de la Universidá d’Uviéu Sergio González Begega, coordinador del proyeutu, y Claudia Suárez Arbesú, analista de datos ya investigadora de la Fundación Universidá d’Uviéu. Amás, el proyeutu va cuntar cola participación de los tamién profesores del departamentu de Socioloxía de la Universidá d’Uviéu José Pablo Calleja Jiménez y Arturo Colina Vuelta, como miembros del comité asesor y d’auditoría interna de calidá.
Redaición InfoAsturies
This work is licensed under a Creative Commons Attribution 4.0 International License.
