El VII Congresu Internacional al rodiu les ADEE (Acondroplasia y otres displasies esquelétiques con enanismu) aconceyó a más de 600 persones nel Palaciu de Congresos del Recintu Ferial Luis Adaro
La Fundación ALPE, entidá a la que’l Conceyu de Xixón entregó la medalla la ciudá en 2022, entama esti conceyu de tres díes que fina güei cola entrega de los V Premios ALPE al meyor llabor en favor de les persones con ADEE y conceyos ente dellos grupos d’organizaciones del mundu.
Los asistentes, alrodiu de 600, son mayoritariamente grupos familiares qu’acuden al alcuentru a la gueta de los avances caberos sobro tolo qu’atañe a l’acondroplasia (enanismu) y a los problemes -non solo médicos- qu’esta conlleva y porque nelli úfrese a los/es asistentes la posibilidá de consultar el so casu, o el del so familiar, de baldre, con dalgún/a de los/es espertos/es qu’aporten a Xixón.
L’actividá ye intensa a lo llargo d’estos tres díes nos que se traten cuestiones comu’l desendolcu y medru personal de reciella y mocedá con ADEE, poniendo enfotu na formación de los pas y mas en tolo que tien de ver cola so condición, médica y socialmente, o la concienciación de los profesionales sanitarios sobro la importancia efeutiva de l’atención y curiáu na calidá de vida de los pacientes.
Destacóse la emportancia del espardimientu na sociedá d’una imaxe real de les persones con enanismu, alloñada d’estereotipos dañinos.
La Fundación ALPE tien la misión d’ameyorar la calidá de vida de les persones con ADEE, acondroplasia y otres displasies esquelétiques con enanismu, en tol mundu.
Redaición InfoAsturies
This work is licensed under a Creative Commons Attribution 4.0 International License.
