La fecha del 12 d’ochobre ye esti añu la escoyía pa esti homenaxe, tanto por asitiase metanes del periodu revolucionariu asturianu, como pola sinificación que pa los españoles tien esa xornada, na que cellebren una “Hispanidá” nidiamente venceyada al conceutu más colonialista de lo que ye España
El prósimu 12 d’ochobre Andecha Astur cellebrará un duple homenaxe a la revolución asturiana d’Ochobre del 34, primero visitando’l cimenteriu onde reposen los restos de los Mártires de Carbayín y lluéu al de Pando, onde ta enterráu’l presidente del Conseyu Soberanu, Belarmino Tomás.
La primer cita sedrá a les 12:30 hores nel cimenteriu Carbayín, onde tan enterraos los 24 homes que fueron asesinaos depués de la ofensiva que los trabayaores de la cuenca del Nalón llevaron a cabu nos primeros díes de la revolución.
La segunda, a les 13:30 hores nel cimenteru Pandu, onde se fadrá un actu de reconocimientu y homenaxe al presidente del Conseyu Soberanu, Belarmino Tomás, ún de los principales protagonistes de la revolución d’Ochobre del 34, siendo l’interllocutor que negoció col exércitu de la República Española una rendición pautada que llueu los españoles traicionaríen, protagonizando una represión sangrina y xabaz de la que foron víctimes, pente otros munchos asturianos, los Mártires de Carbayín.
Con ellos quier representáse’l valor de tol pueblu asturianu, que se defendió frente al exércitu de la República Española. Dende Andecha Astur ven naquellos fechos hestóricos y na República Obrera y Campesina d’Asturies un referente a siguir “frente al proyeutu d’esfarrapamientu, esaniciu, paru, precariedá, emigración forciada de la mocedá y asimilación colonialista que l’Estáu español tien entamáu p’Asturies.”
Amás, esti añu tornarán a llantase les plaques n’alcordanza del Presidente Belarmino Tomás, en sustitución de les esistentes dende hai más de 20 años, y que vienen de ser oxetu d’un actu vandálicu del facismu español.
La reposición d’eses plaques “simboliza a la perfeición la reafirmación del compromisu d’Andecha Astur pa col pueblu asturianu, el so futuru y la so memoria”.
Nuria Prendes
This work is licensed under a Creative Commons Attribution 4.0 International License.
