La población asturiana cae’n picáu mes tras mes, pero les cifres de probitú, non ya porcentuales, sinón netes, siguen medrando. Más d’un cuartu de los asturianos, 266.101 en total, viven na miseria, 30.000 más que’n 2015

Nel marcu de la comemoración del 17 d’ochobre, Díi Internacional pal Desaniciu la Probitú, la Rede Europea de Llucha contra la Probitú y l’Esclusión n’Asturies (EAPN-AS) presentó na Xunta Xeneral el  XII Informe ‘L’Estáu de la Probitú. Los datos tornen ser llaceriosos.

Asturies ye la Comunidá Autónoma na que más medró’l porcentaxe de persones en situación de riesgu de probitú y/o esclusión social dende’l 2015 y la tercera na que más medró de magar el 2008.Anguañu hai 266.101 persones en situación de riesgu de probitú y/o esclusión social n’Asturies. Cuasi 30.000 persones más qu’en 2015.

Analizando los indicadores AROPE, la tasa de riesgu de probitú algama al 20,4% de la población asturiana, ello ye, a 206.910 persones. 64.331 más que nel añu 2008.

Tocantes a los indicadores de tipu llaboral, la Baxa Intensidá de Trabayu per Llar (BITH), Asturies ye la tercer comunidá autónoma española con un peor furrulamientu. Asítiase 2,6 puntos porcentuales perriba’l ya de por si malu datu español.

A lo cabero, destácase que nel añu 2021, pal 46 % de les persones en riesgu de probitú la vivienda representaba siquier el 40 % de gastos, ente que para la población xeneral representaba’l 10,5%.

Tres estos datos negativos subyacen delles dinámiques sociales. Per una parte, consolídase un nuevu perfil de probitú caracterizáu por persones con emplegu y estudios medios y/o universitarios. Per otra parte, consolídase l’enclín d’apeoramientu de los indicadores nes muyeres. Les muyeres apioren en tasa AROPE, riesgu de probitú y BITH, ampliando la fienda de xéneru y poniendo de relieve la desigualdá de xéneru.

EL PAPEL DE LES TRESFERENCIES SOCIALES N’ASTURIES

Pa finar, destácase’l papel de les tresferencies sociales comu barrera énte la esclusión social. Nesti sen, de nun haber  pensiones de xubilación nin supervivencia) pal 2021 la tasa de probeza n’Asturies pasaría del 20,4% al 52,7%. Si nun tenemos en cuenta pensiones de xubilación nin supervivencia, la tasa de probitú xorrecería cuasi 9 puntos porcentuales (del 20,4% al 28,8%).

This work is licensed under a Creative Commons Attribution 4.0 International License.