Hai esautamente 85 años, cayíen en manos de los franquistes Avilés y Xixón. Terminaba asina la guerra, que non la llucha, nel Frente Norte y poníase fin a la curtia independencia d’Asturies, declarada meses atrás pa costituyir el Conseyu Soberanu d’Asturies y Llión, qu’en tan curtiu tiempu creo’l so propiu exercitu, emitió la so propia moneda y unvió representantes a la Sociedá de les Naciones a la gueta  de sofitos internacionales, lo que demuestra la organización y premeditación de la declaración.

Asturies quedare sola n’agostu de 1937. Los gudaris vascos rindiéranse’n masa a los facistes italianos en Santoña y agraváronse los problemes de desabastecimientu ya incomunicación cola República Española, que llegó a felicitase pola cayida d’una Asturies que queríen anamtes facista que independiente -anque eso implicara la so propia tumba- . Ello ye que el Gobiernu de la República, dempués d’unvia-yos a última hora armamentu anticuáu, de la Primer Guerra Mundial, con bales que nun coincidíen colos fusiles, reclamó a los asturianos que “unviaren toos el dineru, los cuadros, toles ayalgues d’Asturies, a la embaxada d’España en París”, dando Asturies por perdía de man.